Hetim për dhjetëra kontrata: IPK kërkon largimin e drejtorit të prokurimit në Policinë e Kosovës

Inspektorati Policor i Kosovës (IPK) ka ndërmarrë veprime konkrete lidhur me dyshimet për shkelje ligjore në Policinë e Kosovës, duke rekomanduar suspendimin e drejtorit të departamentit të prokurimit. Zyrtari në fjalë është nën llupën e hetuesve për vepra që ndërlidhen me keqpërdorimin e detyrës zyrtare dhe konfliktin e interesit. Në qendër të këtij hetimi paraprak janë dhjetëra kontrata të lidhura përmes procedurave të negociuara dhe atyre konfidenciale. Organet hetuese po vlerësojnë me detaje ligjshmërinë e këtyre proceseve, mënyrën e marrjes së vendimeve, si dhe shkallën e respektimit të kritereve të përcaktuara me ligj nga ana e zyrtarëve përgjegjës. Në njoftimin zyrtar të IPK-së bëhet e ditur se rekomandimi për suspendim i është dërguar Drejtorit të Përgjithshëm të Policisë së Kosovës. Kjo masë është vlerësuar e domosdoshme për të ruajtur integritetin e procesit hetimor dhe për të parandaluar çdo ndikim të mundshëm deri në përfundimin e procedurave penale. I gjithë procesi hetimor po zhvillohet nën mbikëqyrjen dhe koordinimin e ngushtë me Prokurorinë Speciale të Republikës së Kosovës. Nga IPK-ja kanë siguruar se po ndërmerren të gjitha hapat e nevojshëm proceduralë për të zbardhur deri në fund këto dyshime dhe për të vendosur përgjegjësinë ligjore.