Spanja në zi: I jepet lamtumira e fundit Jesús de Miguel, futbollisti që humbi jetën në fushë

Navahermosa është mbuluar nga trishtimi teksa familjarë, miq dhe personalitete të shquara të sportit i dhanë lamtumirën e fundit futbollistit të CD Tenerife, Jesús de Miguel. 30-vjeçari ndërroi jetë tragjikisht të martën, si pasojë e një përplasjeje të rëndë me portierin kundërshtar gjatë një ndeshjeje të kategorisë së dytë spanjolle. Në ceremoninë mortore të zhvilluar në provincën e Toledos, morën pjesë qindra persona, ndërsa nuk munguan as emrat më të lartë të futbollit spanjoll. Mes të pranishmëve ishin presidenti i Real Madridit, Florentino Pérez, dhe përzgjedhësi i kombëtares spanjolle, Luis de la Fuente, të cilët shprehën ngushëllimet e tyre për këtë humbje të madhe. Para fillimit të ceremonisë, agjenti i futbollistit lexoi një deklaratë të familjes, e cila shprehu mirënjohje të thellë për mbështetjen e pakursyer dhe dashurinë e treguar në këto momente të rënda. Familjarët kërkuan mirëkuptim dhe respektim të privatësisë, duke theksuar se fjalët nuk mjaftojnë për të përshkruar dhimbjen e tyre pas ndarjes së parakohshme nga jeta të të dashurit të tyre. Në shenjë zie për vdekjen e 30-vjeçarit, komuna e Navahermosas, vendlindja e prindërve të tij, shpalli tri ditë zie, ndërsa flamujt në të gjithë zonën janë ulur në gjysmështizë. Kjo ngjarje e rëndë ka shkaktuar një reagim të fortë edhe në radhët e sindikatave të futbollistëve. Shoqata e Futbollistëve Spanjollë (AFE) ka kërkuar zyrtarisht shtyrjen e të gjitha ndeshjeve të planifikuara për këtë fundjavë. Presidenti i AFE-së, David Aganzo, e cilësoi ndalimin e garave si një veprim të domosdoshëm dhe të bazuar në arsye të shëndoshë. Ai shtoi se, pavarësisht interesave financiare, prioriteti i vetëm në këto çaste duhet të jetë respekti për jetën e humbur. “Është një ditë tejet e vështirë. Po përcjellim në banesën e fundit një djalë që la pas një familje të mrekullueshme dhe një vajzë të vogël. Ndalimi i ndeshjeve është vendimi i duhur njerëzor”, deklaroi Aganzo. Nga ana tjetër, përzgjedhësi Luis de la Fuente u shpreh se prania e tyre në varrim është një gjest i domosdoshëm për të dëshmuar solidaritetin e të gjithë komunitetit sportiv ndaj familjes së viktimës.