Bilanci i tetorit në Ferizaj: Mbi 100 të lënduar nga aksidentet rrugore

Policia Rajonale e Ferizajt ka publikuar raportin statistikor për muajin tetor 2026, duke evidentuar një situatë shqetësuese sa i përket sigurisë në trafik. Gjatë kësaj periudhe, në rajonin që përfshin komunat Ferizaj, Kaçanik, Shtime, Shtërpcë dhe Hani i Elezit, janë shënuar gjithsej 131 aksidente, ku si pasojë 106 persona kanë pësuar lëndime trupore. Sipas të dhënave zyrtare, nga numri total i aksidenteve, 74 prej tyre kanë qenë me të lënduar, ndërsa 57 kanë rezultuar vetëm me dëme materiale. Krahasuar me muajin tetor të vitit 2025, kur ishin regjistruar 141 aksidente, statistikat e këtij viti tregojnë një rënie të numrit të përgjithshëm prej 7.1 për qind. Megjithatë, shqetësim mbetet rritja e aksidenteve me lëndime. Nëse në tetorin e vitit të kaluar ishin raportuar 57 aksidente të tilla me 91 të lënduar, këtë vit shifrat kanë shënuar trend rritës. Në përpjekje për të vënë nën kontroll situatën, Policia Rajonale ka ndërmarrë masa ndëshkuese, duke shqiptuar 6 mijë e 895 gjoba për shkelësit e rregullave të trafikut, që krahasuar me 6 mijë e 847 gjobat e vitit të kaluar, shënon një ngritje prej 0.7 për qind. Autoritetet policore kanë konfirmuar se do të intensifikojnë aktivitetet operacionale me synim parandalimin e aksidenteve dhe rritjen e sigurisë në rrugë. Në këtë drejtim, Policia u ka bërë thirrje të gjithë pjesëmarrësve në komunikacion që të tregojnë kujdes të shtuar dhe të respektojnë përpikërisht shenjat dhe rregullat e trafikut.