Media zvicerane: Lindrit Kamberi pritet të ftohet për herë të parë në Kombëtaren e Kosovës

Futbollisti Lindrit Kamberi po kalon formën më të mirë të karrierës së tij, gjë që e ka dëshmuar edhe gjatë këtij edicioni në elitën e futbollit zviceran. Kamberi po kalon një periudhë shumë të mirë te FC Zürichu. Për kapitenin 27-vjeçar të skuadrës zvicerane vjen tani një shpërblim i veçantë: sipas informacioneve të mediumit zviceran “Blick”, ai pritet të përfshihet për herë të parë në listën e Kombëtares A të Kosovës. Në kampionat, gjërat kanë shkuar shkëlqyeshëm për Kamberin gjatë javëve të fundit, ndërsa tani 27-vjeçarin e pret një tjetër moment i veçantë. Kapiteni i FC Zürichut pritet të ftohet nga Kosova për ndeshjet e fundit të Ligës së Kombeve kundër Izraelit dhe Irlandës. Rreth shtatë vjet pas paraqitjes së tij të fundit me kombëtaren U20 të Zvicrës, Kamberi pritet që më 14 nëntor, në Prishtinë, të ketë mundësinë të debutojë me Kombëtaren A të Kosovës. Mbrojtësi, i njohur për fizikun e tij të fuqishëm, e ka merituar mundësinë për t'u paraqitur në nivel ndërkombëtar falë paraqitjeve të vazhdueshme dhe të mira. Te FC Zürichu, pas disa vitesh me luhatje sportive, Kamberi është shndërruar në një figurë të padiskutueshme udhëheqëse. 27-vjeçari tashmë është një prej figurave kryesore të një skuadre e cila është ndërtuar kryesisht me futbollistë të akademisë së klubit. Vetë mbrojtësi i mbron ngjyrat e Zürichut prej më shumë se nëntë vjetësh.