Formë e jashtëzakonshme, sulmuesi kuqezi thellon rekordet në futbollin italian

Kristian Shpendi po kalon një nga fazat më të arta të karrierës së tij, duke u shndërruar në boshtin kryesor të Çezenas dhe në një nga figurat më të spikatura të panoramës futbollistike në Itali. Sulmuesi me origjinë shqiptare po shkëlqen në këtë edicion të Serie B, ku jo vetëm mban vendin e parë në listën e golashënuesve, por ka vendosur edhe një primat mbresëlënës që e dallon nga çdo lojtar tjetër në ligat profesioniste italiane. Pas 10 javëve të para të garës, Shpendi ka tundur rrjetën 8 herë, duke qenë bombarduesi më i mirë i Serie B. Ecuria e tij ka qenë e jashtëzakonshme që në nisje të sezonit, pasi arriti të shënonte në secilën nga pesë sfidat e para, përpara ndërprerjes së parë kalendarike. Pas një pauze në përballjet kundër Beneventos, Avellinos dhe Modenas, 23-vjeçari është rikthyer me vrull, duke shënuar dy herë në dy takimet e fundit. Fillimisht, ai realizoi një perlë ndaj Empolit dhe më pas shënoi sërish në transfertën kundër Sudtirolit, duke kurorëzuar një rikthim bindës te forma e tij më e lartë. Megjithatë, ajo që e bën edhe më domethënës këtë sezon nuk është vetëm numri i golave, por pesha vendimtare që ai mban në lojën dhe fatet e Çezenas. Sipas të dhënave statistikore, sulmuesi shqiptar mban rekordin për përqindjen më të lartë të golave të shënuar nga një lojtar i vetëm në raport me totalin e skuadrës së tij në nivelin profesionist italian. Nga 11 gola gjithsej që ka shënuar Çezena, plot 8 mprehin firmën e Shpendit. Kjo do të thotë se ai ka realizuar 72.7 për qind të golave të ekipit, një tregues i qartë i varësisë së madhe që skuadra ka nga nuhatja e tij para portës. Nëse kësaj i shtojmë edhe asistet, ndikimi i tij në golat e Çezenas kap shifrën e rreth 82 për qind. Për më tepër, Shpendi ka regjistruar edhe një asist për Fiori në barazimin 1-1 kundër Avellinos, duke dëshmuar se kontributi i tij shtrihet përtej finalizimit të pastër. Në këtë klasifikim të veçantë, talenti shqiptar lë pas shumë emra të tjerë të njohur. Në vendin e dytë pozicionohet Antonio Di Nardo i Juve Stabias me 7 gola nga 11 të skuadrës (63.6%), i ndjekur nga Gustavo Varela i Monzas, një nga zbulesat e Serie A, me 9 gola nga 17 të regjistruar nga ekipi (59%). Më tej renditen Daniel Maldini i Cagliarit me 55.6%, Leonardo Belini i Pianeses me 57% dhe Jakopo Mankoni i Kasertas me 50%. Edhe mes sulmuesve të tjerë të Serie B, epërsia e Shpendit është e ndjeshme. Beloti i Modenas ka shënuar 38.9 për qind të golave të ekipit të tij, ndërsa Saporiti dhe Bonazoli regjistrojnë nga 40 për qind përkatësisht me Empolin dhe Kremonesen. Një tjetër dimension që e lartëson këtë ecuri është paralelizmi me të kaluarën e tij. Që kur ka nisur karrierën si profesionist, Shpendi nuk kishte regjistruar kurrë një shifër kaq të lartë pas 10 javësh kampionat. Në sezonin 2023-2024 në Serie C kishte shënuar 7 gola në 10 ndeshjet e para, ndërsa në vitin e tij të parë në Serie B kishte arritur në kuotën e 6 golave. Një vit më parë, në të njëjtën periudhë, kishte gjetur rrjetën vetëm 4 herë. Tashmë, me 8 gola në bagazhin e tij, sulmuesi ka vendosur një standard të re personale dhe synon të thyejë edhe kufirin e tij historik të golave brenda një faze.