Procesi i integrimit: Kryetarja e Kuvendit, Albulena Haxhiu, pranon nga ambasadori i BE-së Raportin e Progresit

Kryetarja e Kuvendit të Kosovës, Albulena Haxhiu, ka zhvilluar një takim zyrtar me ambasadorin e Bashkimit Evropian në Kosovë, Dirk Schuebel, gjatë të cilit i është dorëzuar zyrtarisht Raporti i Progresit i Komisionit Evropian për vendin. Në qendër të bisedës mes dy zyrtarëve kanë qenë vlerësimet e dala nga ky dokument, angazhimet e ardhshme të institucionit ligjvënës, si dhe hapat konkretë që duhet të ndërmerren për të çuar përpara axhendën evropiane të Kosovës. Nëpërmjet një njoftimi në rrjetet sociale, Haxhiu ka bërë të ditur se fokusi kryesor i bisedës ka qenë nevoja për intensifikimin e reformave dhe adresimin e menjëhershëm të fushave ku janë shënuar vonesa. Ajo ka vënë në dukje se rifillimi i punës në Kuvend paraqet një mundësi ideale për t'i dhënë një hov të ri procesit të ndryshimeve rrënjësore. Sot prita në takim ambasadorin e Bashkimit Evropian në Kosovë, Dirk Schuebel, me të cilin diskutuam për Raportin e Komisionit Evropian dhe punën që kemi përpara në rrugën tonë drejt BE-së. Tani që Kuvendi i është kthyer punës, kemi mundësinë t’i japim një ritëm të ri reformave dhe të shënojmë përparim në fushat ku janë evidentuar ngecje. Diskutuam veçanërisht për Agjendën e Reformave, Planin e Rritjes dhe rëndësinë e përmbushjes së detyrimeve brenda afateve, si dhe për shqyrtimin e aplikimit të Kosovës për anëtarësim në Bashkimin Evropian. Shpreha gatishmërinë për ta thelluar bashkëpunimin mes Kuvendit dhe Zyrës së BE-së, sidomos në procesin legjislativ dhe mbikëqyrjen e zbatimit të reformave. Rruga drejt Bashkimit Evropian kërkon punë të vazhdueshme, përkushtim dhe përgjegjësi nga të gjitha institucionet. Besoj se me bashkëpunim dhe me angazhim të përbashkët mund të shënojmë përparim të dukshëm në reformat që i duhen vendit dhe qytetarëve tanë.