“U bënë shkrumb e hi” – Dëshmitë rrëqethëse të banorëve pas shpërthimit të fuqishëm në Elbasan

Një shpërthim i fuqishëm, i pasuar nga flakë dhe tym i dendur, ka tronditur banorët e një pallati në qytetin e Elbasanit këtë të mërkurë, duke lënë pas dëme të konsiderueshme materiale në apartamente. Një prej banoreve të zonës ka rrëfyer për mediat se situata ka qenë shkatërruese për shtëpinë e saj, duke humbur çdo gjë nga flakët. “Pafund, i kam patur të gjitha brenda dhe u dogjën e u bënë shkrumb”, u shpreh ajo, duke përshkruar përmasat e dëmeve në banesën e saj. Ndërkohë, një tjetër dëshmitar ka dhënë detaje se si e ka përjetuar momentin kritik, kur e gjithë lagjja u mbulua nga tymi i zi. Ai konfirmoi se personat e lënduar tashmë janë jashtë rrezikut për jetën, pasi kanë marrë trajtimin e nevojshëm mjekësor. “Unë banoj në kat të parë. Unë isha në lokal me një shokun tim kur dëgjuam një zhurmë bum. U turra me vrap bashkë më shokun, e pash plakën shtrirë. Mora edhe nusen e nxora jashtë. Ishte tym i zi nuk hyje dot”, tregoi banori i pallatit.