Komisioni Evropian lëshon alarmin: Ndryshimet për Gjykatën Speciale rrezikojnë të bllokojnë rrugën e Kosovës drejt BE-së

Raporti më i ri i Komisionit Evropian për Kosovën vë në pah ngecjen e ndjeshme të procesit të reformave thelbësore, duke ngritur shqetësimin se çdo amendament lidhur me Dhomat e Specializuara mund të shndërrohet në një pengesë serioze për integrimin evropian. Aplikimi i vendit për anëtarësim mbetet ende pa u shqyrtuar, ndërkohë që bisedimet me Serbinë vazhdojnë të mbeten kusht primar për përparimin drejt Brukselit. Megjithëse renditet në grupin e dhjetë vendeve kandidate për zgjerim, Kosova nuk gëzon ende trajtim të barabartë në paketën aktuale. Dokumenti i Komisionit përsërit vetëm vullnetin për të përgatitur opinionin përkatës, por kësaj radhe ka lëshuar një paralajmërim të qartë se zhvillimet rreth Speciales rrezikojnë drejtpërdrejt aspiratat euro-atlantike të shtetit. “Megjithatë, për t’i bindur shtetet anëtare, Kosovës i duhen institucione të qëndrueshme, të cilat tani do t’i ketë, dhe përparim në reforma. Sa më i fortë të jetë bilanci i Kosovës në reforma, aq më e fortë do të jetë edhe mbështetja për të në vazhdim. Tani, me qeverinë e re, shpresoj që vendi të ketë mundësinë të ecë përpara. Megjithatë, amendamentet për Dhomat e Specializuara të Kosovës rrezikojnë ta minojnë çdo përparim. Për këto amendamente jemi tashmë në dialog me qeverinë e Kosovës”, deklaroi Marta Kos. Në aspektin e brendshëm, raporti evidenton ngecje në fusha vitale, duke regjistruar vetëm progres të kufizuar në sundimin e ligjit. Sektori i drejtësisë nuk shënon asnjë përmirësim dhe vijon të përballet me ndikime nga politika dhe ekonomia, ndërsa fushata kundër korrupsionit ka prodhuar rezultate minimale. Pak më pozitive paraqitet situata në luftën kundër krimit të organizuar, ku vërehen disa hapa para. Sipas vlerësimeve, polarizimi politik ka shkaktuar dobësim të institucioneve dhe ka ngadalësuar axhendën e reformave. Ashtu si në vitet paraprake, dialogu përsëritet si kriter i pazëvendësueshëm për avancimin drejt Bashkimit Evropian, ndërkohë që mungesa e takimeve në nivel të lartë ka hyrë tashmë në vitin e saj të katërt. “Në Kosovë, për një vit nuk kemi pasur një qeveri që funksionon realisht dhe institucione në vend, dhe kjo e ka penguar takimin trepalësh. Ndërkohë, në Serbi u mbajtën zgjedhje dhe duhet të shohim që të formohet qeveria. Por mund t’ju siguroj se jam e gatshme të angazhohem dhe do të angazhohem me ta, siç kam bërë me autoritetet deri tani, që ky proces të ecë vërtet përpara. Sepse është e vërtetë se kjo është e domosdoshme që të dyja të përparojnë në rrugën e zgjerimit”, deklaroi Kaja Kallas. Dokumenti kritikon ashpër veprimet e njëanshme të Prishtinës zyrtare në veri të vendit, ndërsa Beogradit i adreson akuza për shkelje të marrëveshjeve të dialogut, përmes fushatave diplomatike kundër anëtarësimit të Kosovës në mekanizmat ndërkombëtarë. Sa i takon lirisë së shprehjes, vlerësimet flisin për progres të kufizuar, duke vënë në shënjestër retorikën agresive të zyrtarëve shtetërorë ndaj komunitetit të gazetarëve. Lidhur me transmetuesin publik, në raport theksohet gjendja e rëndë financiare e RTK-së dhe domosdoshmëria e miratimit të një ligji të ri, i cili do t'i garantonte kësaj medie qëndrueshmëri buxhetore afatgjatë.