Bllokimi Shkup-Sofje, eurodeputeti Waitz i kërkon Komisioneres Kos angazhim të shtuar diplomatik

Gjatë mbledhjes së Komitetit të Punëve të Jashtme (AFET) të Parlamentit Evropian ku u shqyrtua pakoja e zgjerimit, raportuesi për Maqedoninë e Veriut, Thomas Waitz, i ka kërkuar Komisioneres Evropiane Marta Kos që të ndërmarrë nisma intensive diplomatike për t'i dhënë zgjidhje mosmarrëveshjeve mes Maqedonisë së Veriut dhe Bullgarisë. Duke sjellë një shembull pozitiv të bashkëpunimit rajonal, Waitz vlerësoi qasjen e Kroacisë dhe Malit të Zi. Ai shprehu falënderimet e tij për kryeministrat Andrej Plenkoviç dhe Milojko Spajiç, të cilët, sipas tij, zgjodhën dialogun e drejtpërdrejtë dhe tryezën e bisedimeve për të mbyllur çështjet dypalëshe, duke dëshmuar se kontestet e tilla nuk duhet të bëhen kurrë pengesë në rrugën drejt integrimit evropian. Eurodeputeti u shpreh i bindur se ky model bashkëpunimi përfaqëson një praktikë të shkëlqyer që mund të shërbejë për zgjidhjen e ngërçit aktual mes Shkupit dhe Sofjes, ku kërkohet domosdoshmërisht vullnet për dialog. Sipas tij, disa nga çështjet dypalëshe tashmë janë shndërruar në sfida evropiane, ku përfshihet çështja e të drejtave të pakicave dhe zbatimi i ndryshimeve kushtetuese. Megjithatë, ai këmbënguli se rruga e vetme e shpëtimit nga ky bllokim mbetet komunikimi i drejtpërdrejtë ndërmjet qeverive të të dy vendeve, duke i bërë thirrje Komisioneres Kos që të ushtrojë ndikimin e saj diplomatik për të nxitur këtë proces. Nga ana e saj, Komisionerja Kos kishte prezantuar më herët pakon e zgjerimit për vitin 2026, e cila përfshin raportet e Komisionit Evropian për dhjetë shtetet kandidate. Ajo theksoi se dyert janë të hapura për çdo vend që dëshiron të bashkohet me grupin e shteteve që po ecin me hapa të shpejtë drejt BE-së, duke i ftuar të gjithë kandidatët që të bëjnë këtë zgjedhje. Sa i përket Maqedonisë së Veriut, Kos vuri në dukje se ekzekutivi vendor po shfaq përkushtim ndaj agjendës reformuese. Për më tepër, ajo garantoi se Komisioni Evropian do të vijojë mbështetjen për shtetin në procesin eurointegrues, me synimin që grupi i parë i kapitujve të hapet menjëherë sapo të pëushtohen parakushtet, ndërsa theksoi se tani gjithçka varet nga përmbushja e detyrimit për ndryshimet kushtetuese, në përputhje me konkluzionet e Këshillit të 18 korrikut 2022.