Inskenoi vjedhjen e mbi 100 armëve në Gjakovë pasi i shiti ilegalisht, kërkohet paraburgim për të dyshuarin

Prokuroria Themelore në Gjakovë ka ndërmarrë hapa ligjorë duke nxjerrë aktvendim për nisjen e hetimeve dhe duke dorëzuar kërkesë për caktimin e masës së paraburgimit ndaj një personi, i cili dyshohet se ka inskenuar vjedhjen e një numri të madh armësh nga poligoni. Sipas hetimeve paraprake, i dyshuari ka tregtuar në mënyrë të paligjshme dhe me dashje 110 armë zjarri që ndodheshin nën kujdesin e tij në poligon. Për të fshehur veprimtarinë e tij, ai më pas is ankuar në organet e rendit duke sajuar një ngjarje kinse armët i janë vjedhur. Në dosjen e siguruar nga Prokuroria theksohet se ekziston dyshimi i bazuar se i pandehuri me inicialet V.C., gjatë periudhës nga fillimi i muajit tetor 2026 e deri më 30.10.2026, në qytetin e Gjakovës, saktësisht në poligonin e armëve “T…”, ka shitur pa autorizim mbi 110 armë zjarri nga deponia e poligonit të licencuar. Blerës të dyshuar janë personat me inicialet D.P. dhe L.U., të cilët aktualisht janë në arrati. Për t'i shpëtuar përgjegjësisë, i dyshuari kishte njoftuar Policinë e Kosovës duke paraqitur në mënyrë të rreme se arsenali ishte vjedhur. I dyshuari do të përballet me drejtësinë nën dyshimin për kryerjen e veprave penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” dhe “Lajmërimi apo kallëzimi i rremë”. Ndërkohë, lidhur me dy personat e tjerë të përfshirë në këtë çështje, D.P. dhe L.U., të cilët ndodhen në arrati, institucioni i akuzës ka lëshuar aktvendim për fillimin e hetimeve nën dyshimin e bazuar se kanë kryer veprën penale të tregtimit të paautorizuar të armëve apo materieve plasëse.