Operacion antidrogë në Itali: Bie në pranga duoja shqiptare, kapen mbi dy kilogramë kokainë të fshehura në dyshemenë e makinës

Autoritetet italiane kanë vënë në pranga dy shtetas shqiptarë, të moshës 23 dhe 28 vjeç, pasi gjatë një kontrolli rutinë në automjetin e tyre është zbuluar dhe sekuestruar një sasi prej mbi dy kilogramësh lëndë e dyshuar narkotike e llojit kokainë, e cila ishte fshehur me kujdes në një vendkalim sekret. Sipas burimeve policore lokale, ndërhyrja u realizua nga efektivët e Policisë së Shtetit në rajonin e Bolonjës. Mjeti, i cili po lëvizte nga zona e Valsamoggias dhe figuronte në pronësi të një gruaje që banon në provincën e Sienës, ngjalli dyshime te uniformat blu për shkak të sjelljes së dyshimtë të dy udhëtarëve në bordin e tij. Nervozizmi i dukshëm i të rinjve gjatë ndalimit detyroi forcat e rendit që të thellojnë verifikimet përmes një kontrolli të imtësishëm të mjetit, duke zbuluar përfundimisht skemën e fshehjes së drogës. Gjatë kontrollit të detajuar, efektivët dalluan disa anomali në zonën e tapicerisë, konkretisht poshtë pedaleve të drejtimit. Aty ishte modifikuar një hapësirë e posaçme brenda shasisë së automjetit, e cilafunksiononte me një mekanizëm elektronik ose manual hapjeje dhe mbylljeje për të shmangur zbulimin. Në brendësi të këtij vendi të fshehtë u zbuluan dy pako që përmbanin mbi dy kilogramë kokainë të pastër, të cilat u morën në cilësinë e provës materiale së bashku me vetë makinën e përdorur për transportin e tyre. Në përfundim të veprimeve të para hetimore, dy të rinjtë shqiptarë u arrestuan në flagrancë me akuzën e posedimit dhe transportimit të lëndëve narkotike në bashkëpunim. Pas arrestimit, ata janë dërguar në ambientet e paraburgimit të policisë rrugore, ku po presin daljen para autoriteteve gjyqësore për t'u njohur me masën e sigurisë.