Nisma për Parkun Rinia, KQZ jep dritën jeshile për formularët e referendumit vendor

Partia Demokratike ka ndërmarrë hapin e radhës për të ndalur betonizimin e kryeqytetit dhe për të mbrojtur Parkun Rinia. Komisioni Qendror i Zgjedhjeve ka formalizuar miratimin e dokumentacionit përkatës për mbledhjen e firmave, nismë kjo e udhëhequr nga figura të njohura të kësaj force politike si Jamarber Malltezi, Dorjan Teliti, Adriana Kalaja dhe Erges Eskiu. Ky zhvillim cilësohet si një kthesë kyçe për t'i rikthyer banorëve të Tiranës autoritetin mbi vendimmarrjen e qytetit të tyre. Sipas qëndrimit zyrtar, prej vitesh kryeqyteti po vuan nga një qasje urbane ku interesat e ngushta mbizotërojnë mbi hapësirat e gjelbra, ndërkohë që mbipopullimi, ndotja dhe kostot e larta të strehimit mbeten plagë të pazgjidhura për qindra mijëra qytetarë. Sfidës së ngritjes së kullave të reja, Partia Demokratike i kundërvihet me mjetin më të drejtpërdrejtë të demokracisë: referendumin vendor. Përmes këtij procesi ligjor, fati i Parkut Rinia kërkohet të kalojë në duart e qytetarëve dhe jo të vendoset nga një individ i vetëm. Për këtë qëllim, thirrja u drejtohet aktivistëve, shoqërisë civile dhe çdo akteri opozitar që kundërshton degradimin urban, për t'u bërë pjesë e aksionit për mbledhjen e nënshkrimeve. Kjo betejë nuk identifikohet me ngjyra partiake, por shihet si një domosdoshmëri për të ardhmen e fëmijëve dhe për të garantuar se qytetarët nuk do të jenë thjesht spektatorë të vendimeve që diktojnë jetën e tyre. Opozita shprehet e hapur për bashkëpunim të gjerë e pa përjashtime me çdo faktor tjetër, me qëllim përshpejtimin e procedurave të nismës. Në këtë kontekst, mbledhja e firmave në terren shihet si testi i vërtetë i bashkëpunimit opozitar në prag të zgjedhjeve vendore. Apeli përfundumtar thekson nevojën për një opozitë vepruese dhe me qasje qytetare, e cila i lë mënjanë protagonizmat individualë dhe daljet mediatike, për t'u fokusuar te mbrojtja konkrete e interesit publik.