Formati i Formula 1: Mercedes nis furishëm fundjavën në Baku me një performancë mbresëlënëse

Skuadra e Mercedesit ka dominuar plotësisht sesionin e dytë të provave të lira për Çmimin e Madh të Azerbajxhanit, duke siguruar një dopietë bindëse gjatë ditës së parë të aksionit në kryeqytetin Baku. Britaniku Xhorxh Rasëll ka regjistruar kohën më të shpejtë të ditës, duke ndalur kronometrin në 1 minutë, 43 sekonda e 347 të mijtat. Ndërkohë, Kimi Antoneli ka pasur në dispozicion vetëm rreth gjysmë ore për shkak të ndërprerjes së provave me flamur të kuq. Tek bolidi i pilotit italian u desh ndryshimi i njësisë së fuqisë (power unit) pas një problemi hidraulik në sesionin e parë, ndryshim ky që nuk solli asnjë penalizim. Lideri i kampionatit e mbylli këtë sesion me një vonesë prej 552 të mijtat e sekondës krahasuar me shokun e tij të skuadrës. Pozicionin e tretë në pistë e ka kapur Maks Vershtapen me Red Bull, duke u futur mes dy makinave të Mercedesit, por me një prapambetje prej 827 të mijtat e sekondës nga kreu. Sharl Lëklerk dhe Luis Hamilton kanë mbyllur pesëshen më të mirë, ndonëse të dy regjistruan një diferencë prej mbi një sekonde nga Rasëll: 1.126 sekonda për monegaskun dhe 1.318 sekonda për britanikun, i cili madje është vënë nën hetim nga zyrtarët për shkak të një pengimi ndaj Liam Louson. Nga ana tjetër, Lando Norris ka shfaqur një përmirësim të ndjeshëm. Pasi u kufizua në vendin e 14-të gjatë sesionit FP1 për shkak të problemeve me dyshemenë e makinës, kampioni në fuqi i botës është ngjitur në vendin e gjashtë, 1.484 sekonda larg kohës më të mirë. Menjëherë pas tij u rendit Pierr Gasli me Alpine-Mercedes, duke lënë pas Oskar Piastrin në vendin e tetë. Isak Hadxhar, i cili është rikthyer në garë me Red Bullin, e përfundoi sesionin i nënti me një kohë 1.521 sekonda më të ngadaltë se kreu, ndërsa Esteban Okon, i ndodhur tashmë në një situatë ndarjeje me skuadrën Haas, siguroi vendin e dhjetë me një diferencë prej 1.943 sekondash nga Rasëll. Sesioni u ndërpre me flamur të kuq pas rreth 20 minutash lojë, si pasojë e një aksidenti të rëndë të pësuar nga Arvid Lindblad në sektorin më të ngushtë dhe në ngjitje pranë zonës së kështjellës, e cila konsiderohet si pika më sfiduese e të gjithë kalendarit të Kampionatit Botëror. Bolidi Racing Bulls me numrin 41 ka pësuar dëme serioze në pjesën e djathtë. Ky ka qenë një incident i dytë për pilotin britanik debutues në Formula 1, i cili kishte prekur barrierat mbrojtëse edhe gjatë sesionit të parë paradite. Lindblad u rendit i 18-ti në fund të FP2, ndërsa paraqitje më të mirë pati shoku i tij i skuadrës, Liam Louson, i cili u pozicionua i 12-ti, megjithëse mbeti 3.044 sekonda larg kreut.