Ngjarja e rëndë në Bulqizë: U raportua si sulm ariu, arrestohen gruaja dhe djali për vrasjen e kryefamiljarit

Autoritetet policore kanë hedhur dritë mbi rrethanat e ngjarjes tragjike të regjistruar në fshatin Godvi të Bulqizës, ku fillimisht u raportua se një 57-vjeçar kishte humbur jetën pas një sulmi nga një kafshë e egër. Si rezultat i hetimeve intensive dhe ekspertizës mjekoligjore, është zbuluar se bëhet fjalë për një krim brenda familjes, ndërsa janë vënë në pranga bashkëshortja dhe djali i viktimës. Ngjarja e rëndë ka ndodhur më 3 nëntor 2026. Pavarësisht pretendimeve të para të familjarëve se 57-vjeçari me inicialet U.F. ishte vrarë nga një ari, verifikimet e kryera nga Sektori për Hetimin e Krimeve të Rënda pranë Drejtorisë Vendore të Policisë Dibër, në bashkëngjitje me Prokurorinë, faktuan se viktima ishte qëlluar me armë zjarri. Në pranga kanë rënë bashkëshortja e viktimës, gjithashtu 57 vjeçe, dhe djali i tyre 33-vjeçar, të dy banorë të zonës. Sipas bluve, ata dyshohen se në bashkëpunim me njëri-tjetrin i kanë marrë jetën 57-vjeçarit duke përdorur armë zjarri dhe mjete të forta prerëse. Gjatë kontrolleve dhe veprimeve të mirëfillta hetimore, shërbimet e policisë kanë sekuestruar në cilësinë e provës materiale një armë zjarri pistoletë model 54 bashkë me municion luftarak, si dhe një gëzhojë të konstatuar në oborrin e shtëpisë së tyre. Materialet e plota procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Dibër, e cila do të ndjekë hapat e mëtejshëm ligjorë për veprat penale “Vrasja për shkak të marrëdhënieve familjare” dhe “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunim.