Shtrëngim masash në Zvicër: Priten kritere të reja për kompensimin e kujdesit familjar ndaj të moshuarve

Autoritetet zvicerane po përgatisin standarde më rigoroze që rregullojnë pagesën e shërbimeve të kujdesit bazë, të cilat familjarët i sigurojnë në mjedisin shtëpiak për të afërmit e tyre të moshuar ose të sëmurë. Sipas njoftimit zyrtar nga Departamenti Federal i Punëve të Brendshme, një projekt-propozim i tillë do t'i dorëzohet Këshillit Federal për konsultim deri në pranverën e vitit 2027. Ky hap vjen si rrjedhojë e vendimeve të dala nga mbledhja e qeverisë zvicerane e mbajtur më 4 nëntor 2026. Mënyra aktuale funksionon përmes angazhimit të familjarëve nga organizatat e njohura të kujdesit shtëpiak, të njohura si Spitex, ku në kushte të caktuara këto shërbime mbulohen nga sigurimi i detyrueshëm shëndetësor, duke mundësuar kështu kompensimin e tyre financiar. Të dhënat nga Zyra Federale e Shëndetësisë Publike tregojnë se shpenzimet për këtë kategori kujdesi kanë shënuar rritje të ndjeshme në periudhën e fundit. Kjo rritje lidhet edhe me faktin se disa struktura janë fokusuar te punësimi i të afërmve të pacientëve, duke ndikuar drejtpërdrejt në buxhetet e sigurimeve shëndetësore, kantoneve dhe komunave. Nëpërmjet këtij nfrimi rregullator, qeveria synon të vendosë kritere më transparente dhe të sakta për kushtet e pagesës së kujdesit të ofruar nga familjarët, duke synuar njëkohësisht rritjen e cilësisë dhe menaxhimin më efikas të fondeve publike. Megjithatë, Zyra Federale ka bërë të ditur se mundësia e punësimit të familjarëve për qëllime kujdesi nuk do të shfuqizohet, ndërkohë që objektivi kryesor mbetet kontrolli dhe frenimi i hovit të shpenzimeve. Për diasporën shqiptare në Zvicër, kjo reforme mund të ketë një peshë specifike, veçanërisht në rastet kur kujdesi ndaj prindërve apo pjesëtarëve të tjerë të familjes që kërkojnë mbështetje të përditshme bëhet brenda shtëpisë. Aktualisht nuk ekziston ende një rregullore e miratuar dhe nuk është përcaktuar një afat se kur do të hyjnë në fuqi ndryshimet. Detajet dhe kushtet e sakta pritet të bëhen publike gjatë fazës së paraqitjes së projektit për konsultim publik.