Operacioni “Variety” në Tiranë: Vihen në pranga dy persona, kapen kokainë, kanabis dhe armë imituese

Strukturat e policisë në kryeqytet kanë finalizuar me sukses operacionin e koduar “Variety”, duke goditur dy raste të shpërndarjes së lëndëve narkotike dhe duke prangosur dy persona. Aksioni është ndërmarrë nga shërbimet e Forcës së Posaçme “Shigjeta” në bashkëpunim me Seksionin për Hetimin e Narkotikëve, në kuadër të kontrolleve të vazhdueshme për kapjen e personave që qarkullojnë të armatosur apo merren me tregtimin e lëndëve të ndaluara. Në pranga kanë rënë shtetasit R. S., 36 vjeç, dhe I. S., 50 vjeç, të dy banues në Tiranë. Gjatë ndërhyrjes dhe kontrolleve të ushtruara në automjete, në banesa dhe nëpërmjet kontrollit fizik, autoritetet policore kanë zbuluar dhe sekuestruar sasi të konsiderueshme dhe doza të ndara të lëndëve të dyshuara narkotike kokainë dhe Cannabis Sativa. Konkretisht, gjatë kontrollit në automjetin që drejtohej nga 36-vjeçari në rrugën “Njazi Meka”, përveç dozave të drogës, efektivët gjetën dhe sekuestruan një armë pistoletë imituese me zara metalikë, të cilën ai e mbante në makinë. Ndërkohë, gjatë kontrollit të ushtruar në automjetin e 50-vjeçarit në bulevardin “Zogu i Parë”, u konstatua dhe u sekuestrua një tjetër sasi kokaine e ndarë në doza, gati për shitje. Në cilësinë e provës materiale, përveç lëndëve narkotike dhe armës imituese, policia ka sekuestruar edhe automjetet e përdorura nga të dyshuarit, si dhe telefonat e tyre celularë. Dosja penale me materialet procedurale i ka kaluar Prokurorisë për ndjekjen e mëtejshme të veprimeve ligjore.