Amorim jep alarmin para Ferencvarosh: Skuadra kërkon përulësi dhe maksimumin në “San Siro”

Trajneri i Milanit, Ruben Amorim, ka dalë para mediave në konferencën zyrtare për shtyp, në prag të përballjes jetike kundër Ferencvarosh, e cila vlen për xhiron e katërt të fazës së ligës në “Europa League”. Duke vënë theksin te rëndësia e harresës së derbit dhe ruajtjes së ritmit, tekniku u shpreh se skuadra duhet të tregojë vazhdimësi. Sipas tij, paraqitja konstante në derbi duhet të shërbejë si model, duke shtuar se pavarësisht lëvizjeve në formacion dhe rotacionit, Milani mbetet një ekip i madh që luan vetëm për fitoren, e cila është parësore për e ecurinë në këtë kompeticion. Duke u ndalur te rotacioni, strategu u tregua i kujdesshëm ndaj ngarkesës fizike të futbollistëve. Ai shpjegoi se kalendari i ngjeshur nuk lejon rrezikimin e lojtarëve, pasi mungesat e gjata për shkak dëmtimesh mund të kushtojnë shtrenjtë. Edhe pse do të ketë ndryshime në 11-she, grupi është i gatshëm dhe i vetëdijshëm për përgjegjësinë, ndërsa vlerësoi maksimalisht kundërshtarin hungarez, që numëron 9 pikë dhe nuk njeh humbje në kampionat. Në lidhje me ecurinë e luhatshme mes kampionatit dhe “Europa League”, trajneri pranoi se situata kërkon përmirësim. Ai përmendi ndikimin e rotacionit te identiteti i lojës, duke analizuar ndeshjet e kaluara ku gabimet dhe situatat e papritura, përfshirë rastin e Maignan, ndikuan te rezultatet. Amorim pranoi hapur se nuk është plotësisht i kënaqur as në “Serie A” dhe as në skenën evropiane, duke theksuar se ekipi ka potencial për të dhënë shumë më tepër. Në analizën e kundërshtarit, kreu i stafit teknik kuqezi e cilësoi Ferencvarosh si një skuadër me mentalitet fitues, identitet të qartë dhe me alternativa cilësore në çdo repart. Ai veçoi rrezikshmërinë e skemës së tyre 4-2-3-1 dhe rolin e mesfushorit Nagy në organizim. Duke mbyllur konferencën, Amorim kërkoi nga të tjerët të njëjtin qëndrim modest dhe të vëmendshëm si në sfidën ndaj Interit, duke paralajmëruar se hungarezët vijnë në “San Siro” pa presion dhe me dëshirë të madhe për të surprizuar.