Dosja e pasurisë: Çfarë zbulon deklarimi i zyrtarit të lartë Bekim Sali në antikorrupsion

Zëvendëskryeministri dhe ministri për Çështje Evropiane, Bekim Sali, ka dorëzuar formularin e tij të pasurisë në Komisionin Shtetëror për Parandalimin e Korrupsionit, duke pasqyruar një inventar të gjerë të pronave të paluajtshme, bizneseve dhe të ardhurave nga qiraja në kryeqytet. Sipas dokumentit zyrtar, në emër të vetë ministrit figurojnë disa pasuri tokësore, ku spikat një tokë bujqësore prej 1.125 metrash katrorë në Çair me vlerë 600 mijë denarë, si dhe një pronë tjetër bujqësore prej 6.254 metrash katrorë në Matkë, e përftuar përmes trashëgimisë, ku ai zotëron 4/16 e pjesëve. Po ashtu, Sali ka deklaruar një portofol të rëndësishëm pronash afariste në Komunën Qendër të Shkupit, të cilat janë në pronësi të tij të plotë. Bëhet fjalë për tri hapësira biznesi me sipërfaqe prej 158, 300 dhe 82 metrash katrorë, të vlerësuara përkatësisht me 11 milionë, 24.6 milionë dhe 7.38 milionë denarë. Në regjistrin e pasurive të paluajtshme figurojnë edhe asete të familjarëve të ngushtë. Në emër të motrës është regjistruar një ambient afarist prej 84 metrash katrorë në Çair me vlerë 10.3 milionë denarë, ndërsa bashkëshortja e tij zotëron një tokë ndërtimore prej 662 metrash katrorë në Vizbeg, e vlerësuar në 1.5 milionë denarë. Krahas pronave, kreu i dikasterit për Çështje Evropiane ka raportuar edhe fitime vjetore në vlerë prej 648 mijë denarësh, të siguruara nga dhënia e pasurive me qira. Në fushën e sipërmarrjes, anëtari i kabinetit qeveritar figuron pronar i dy klinikave dentare, PZU “Molar Dent” dhe PZU “Molar Implant”, ndërkohë që në emër të bashkëshortes janë regjistruar dy subjekte të tjera tregtare me seli në Shkup, respektivisht “Anna Bora Atelier” dhe “Bleta-S”.