Bilanc pozitiv në rrugët e vendit: Bie ndjeshëm numri i viktimave, Maqedonia synon standarde globale në sigurinë rrugore

Ministri i Punëve të Brendshme, Pançe Toshkovski, ka marrë pjesë në ngjarjen e promovimit të Strategjisë Kombëtare për Sigurinë në Trafikun Rrugor 2026-2030, ku ka vënë në pah se mbrojtja e jetëve njerëzore mbetet misioni parësor i strukturave shtetërore dhe mbarë shoqërisë. Gjatë fjalës së tij, kreu i MPB-së u ndal te statistikat e tri dekadave e gjysmë të fundit, duke bërë të ditur se mesatarisht rreth 150 qytetarë kanë humbur jetën çdo vit në autostradat dhe rrugët e vendit, fakt ky që dëshmon domosdoshmërinë e një qasjeje rrënjësore dhe masave afatgjata. "Kur flasim për sigurinë në përgjithësi, por kur flasim për sigurinë në fushën e trafikut, veçanërisht në 35 vitet e fundit, nuk mund të themi se kemi rezultate vërtet të mira. Numri mesatar i jetëve njerëzore të humbura në 35 vitet e fundit në vit është diku rreth 150 në Maqedoni", u shpreh Toshkovski. Duke paraqitur shifrat më të freskëta, ministri bëri të e ditur se gjatë dhjetë muajve të parë të vitit 2026 janë regjistruar 84 viktima në aksidente trafiku, krahasuar me 117 jetë të humbura në të njëjtën periudhë të vitit të kaluar, që përkthehet në 33 persona më pak. Ai vlerësoi se ky tregues flet për një kthesë domethënëse, aq më tepër po të kihet parasysh se edhe në periudha me qarkullim tejet të kufizuar automjetesh, siç ishin vitet 2001 dhe 2021, bilanci i fataliteteve ishte më i lartë. Në këtë kontekst, Toshkovski shprehu mirënjohjen e tij për kontributin e qytetarëve, duke vlerësuar se reflektimi i tyre në drejtim të një qasjeje më të përgjegjshme në timon, krahas angazhimit institucional, fushatave ndërgjegjësuese dhe mbështetjes nga sektori i korporatave e shoqëria civile, kanë dhënë frytet e duhura në frenimin e tragjedive rrugore. "Në këtë ditë, dua të shfrytëzoj këtë rast për t'i falënderuar edhe një herë qytetarët, kryesisht sepse ata janë ata që kanë kontribuar më shumë në uljen e numrit të viktimave në Maqedoni. Ata janë ata që kanë vendosur të drejtojnë automjete motorike dhe të jenë pjesëmarrës në trafik më të ndërgjegjshëm se më parë", theksoi ai. Sa i përket dokumentit të ri strategjik, Toshkovski theksoi se synimi kryesor është që deri në vitin 2030 shifra e viktimave në aksidente të përgjysmohet (ulje me 50 për qind) në krahasim me vitin 2024. Kjo strategji mbështetet mbi moton "Çdo jetë ka rëndësi" dhe parashikon bashkërendim të forcave ndërmjet shtetit dhe komunitetit, duke vënë theksin te parandalimi, arsimimi, rritja e kulturës së qarkullimit dhe përdorimi i teknologjive bashkëkohore. "Një person gjithmonë mund të bëjë një gabim gjatë drejtimit të një automjeti, por është shteti që duhet të bëjë gjithçka për të zvogëluar numrin e viktimave në trafik, për të zvogëluar numrin e personave të lënduar në trafik dhe për të bërë gjithçka që të jetë në gjendje të veprojë sa më parandalues që të jetë e mundur në mënyrë që të përmirësojë trafikun", përfundoi ministri Toshkovski.