Sekuestrohet drogë me vlerë 1 milion euro në aeroportin e Athinës, dërgesa vinte nga Tajlanda

Autoritetet greke kanë bërë publike sekuestrimin e një sasie prej 207 kilogramësh marihuanë në aeroportin ndërkombëtar të Athinës, e cila kishte mbërritur nga Tajlanda e fshehur mes veshjeve. Zbulimi u bërë i ditur të mërkurën, ndërkohë që operacioni ishte zhvilluar në fund të verës. Sipas njoftimit zyrtar të policisë, lënda narkotike u zbulua gjatë muajit gusht brenda kutive të kartonit në ambientet e magazinimit të përkohshëm në aeroportin "Eleftherios Venizelos". Autoritetet nuk kanë sqaruar ende arsyet e vonesës prej më shumë dy muajsh për publikimin e këtij operacioni. Në njoftimin e policisë theksohet se marihuana, e cila kap një vlerë tregu prej rreth 1 milion eurosh, kishte mbërritur përmes një fluturimi direkt nga Tajlanda. Megjithatë, deri më tani nuk ka asnjë informacion zyrtar mbi organizatorët e kësaj dërgese apo mbi destinacionin e saj final.