Operacion i madh antidrogë në Kosovë: Sekuestrohen mbi 37 kg narkotikë me vlerë 550 mijë euro, vihen në pranga 5 persona

Gjatë një aksioni të përbashkët të zhvilluar mbrëmë nga Prokuroria Speciale, Policia e Kosovës dhe Agjencia Kosovare e Inteligjencës (AKI), është goditur një rrjet i trafikimit të substancave narkotike, ku si pasojë janë arrestuar pesë persona dhe janë sekuestruar rreth 37 kilogramë drogë, vlera e së cilës kap shifrën e rreth 550 mijë eurove. Në një konferencë të jashtëzakonshme për media, prokurori i rastit, Atdhe Dema, bëri të ditur se ky aksion është frymë e një bashkëpunimi të ngushtë ndërinstitucional. Sipas tij, të pandehurit dyshohet se vepronin si pjesë e një grupi të strukturuar kriminal, të specializuar në blerjen dhe shpërndarjen e lëndëve narkotike. Dema u shpreh se, bazuar në të dhënat e para, substanca e kapur dyshohet të jetë heroinë, ndërsa lloji dhe pesha e saktë do të përcaktohen përfundimisht pas kryerjes së ekspertizave dhe analizave laboratorike. Ndaj pesë të dyshuarve është shqiptuar masa e ndalimit policor prej 48 orësh, ndërkohë që institucionet e drejtësisë po finalizojnë dosjen për të ndërmarrë hapat e mëtutjeshëm ligjorë. Nga ana e tij, ushtruesi i detyrës së kryeprokurorit të Prokurorisë Speciale theksoi se angazhimi kundër krimit të organizuar dhe trafikimit të narkotikëve do të mbetet i palëkundur dhe pa asnjë kompromis. Ai gjithashtu bëri thirrje për maturi në trajtimin dhe publikimin e të dhënave, duke qenë se hetimet pritet të shtrihen edhe në faza të tjera.