Valë mashtrimesh në WhatsApp: KOS-CERT tregon hapat për të rimarrë kontrollin e llogarive të hakuara

Ditëve të fundit, një numër i konsiderueshëm i përdoruesve të aplikacionit WhatsApp janë përballur me vështirësi në qasjen e llogarive të tyre. Ndonëse fillimisht u dyshua për një defekt teknik nga kompania Meta, ekspertët e sigurisë kibernetike kanë sqaruar se bëhet fjalë për një strategji keqdashëse. Hakerët nuk kanë depërtuar në infrastrukturën e sigurisë së Metës, por po shfrytëzojnë inxhinierinë sociale për të mashtruar përdoruesit. Sipas ekspertëve, sulmuesit dërgojnë lidhje (linqe) të rreme që shfaqen si njoftime për votime, konkurse apo shpërndarje fotografish. Sapo përdoruesi ndjek udhëzimet e këtyre linkeve, sulmuesit arrijnë të sinkronizojnë llogarinë e viktimës me pajisjen e tyre, duke përdorur funksionin legjitim të aplikacionit për lidhjen e pajisjeve (Linked Devices). Njësia Kombëtare e Sigurisë Kibernetike (KOS-CERT) ka reaguar zyrtarisht lidhur me këtë valë sulmesh. Ata bënë të ditur se janë duke trajtuar me prioritet rastet e raportuara të komprometimit të llogarive dhe po bashkëpunojnë ngushtë me institucionet përkatëse për të gjetur një zgjidhje sa më të shpejtë. Në një njoftim për publikun, KOS-CERT theksoi: “Jemi duke analizuar rastet e raportuara dhe po komunikojmë me palët relevante për të menaxhuar këtë situatë”. Për qytetarët që tashmë janë bërë pre e këtyre sulmeve, autoriteti ka publikuar një udhëzim konkret për rikthimin e llogarisë përmes formularit zyrtar të WhatsApp: https://www.whatsapp.com/contact/?subject=messenger. Gjatë plotësimit të këtij formulari, përdoruesit duhet të jenë të saktë duke specifikuar numrin e telefonit, përshkrimin e problemit dhe datën kur ka ndodhur incidenti. Si masë parandaluese, KOS-CERT u rekomandon të gjithë qytetarëve që të përditësojnë aplikacionin në versionin e fundit dhe të aktivizojnë domosdoshmërisht verifikimin me dy hapa (Two-Step Verification) për një siguri më të lartë.