Luis Enrique shpërthen ndaj gjyqtarit pas dramës me tre lojtarë më pak dhe feston forcën e PSG-së në Evropë

Strategu i Paris Saint-Germainit, Luis Enrique, ka shfaqur hapur entuziazmin e tij për paraqitjen e jashtëzakonshme të skuadrës, e cila dhuroi një ndeshje spektakolare me gjashtë gola, duke dëshmuar edhe një herë autoritetin e saj në arenën evropiane. Kryetrajneri spanjoll vuri theksin te dëshira dhe ritmi i lartë i futbollistëve të tij, të cilët nuk e lëkundën asnjëherë qasjen e tyre sulmuese gjatë gjithë sfidës, pavarësisht se si rridhte rezultati. “Kemi luajtur në të njëjtën mënyrë, me të njëjtën ambicie, pa marrë parasysh ndeshjen apo rezultatin. Kur luan në të njëjtën mënyrë, çfarëdo që të ndodhë, është pozitive. E kemi respektuar kundërshtarin duke luajtur me të njëjtin intensitet gjatë gjithë ndeshjes. Për çdo skuadër që pëson tri gola brenda pesë minutash, është e vështirë të rikthehet”, deklaroi Luis Enrique. Pavarësisht epërsisë komode të parisienëve në krye, tekniku nga Asturia nuk pranon në asnjë mënyrë rënien në vetëkënaqësi të grupit. “Kjo nuk vlen për asgjë. Vetëm një skuadër do të shpallet kampione në Madrid. Ne nuk kemi përfunduar në mesin e tetë skuadrave të para në dy vitet e fundit, por më pas jemi shpallur kampionë. Jemi të kënaqur me ambicien, por gara e vërtetë fillon në shkurt, me fazën eliminatore”, theksoi ai. Megjithatë, pjesa e fundit e prononcimit u karakterizua nga indinjata e madhe e trajnerit ndaj vendimeve të arbitrit gjatë një aksioni për zëvendësime të trefishta në minutën e 74-t. Për shkak të zvarritjes nga ana e lojtarëve që po lëshonin fushën e blertë, gjyqtari mori vendimin e pazakontë që PSG-ja të detyrohej të luante për një minutë me tre futbollistë më pak. Për të përshpejtuar veprimin, Luis Enrique shtyu lehtësisht njërin prej lojtarëve që pritej të futej në lojë, veprim ky që i kushtoi me një karton të verdhë. “Çështja e tri zëvendësimeve ishte një farsë. Nëse rezultati do të ishte 0-0 dhe do të më largonin tre lojtarë, pastaj unë shtyva njërin dhe i dhanë karton të verdhë, por e lejuan të vazhdonte në fushë, do t’i kisha shtyrë edhe dy të tjerët. Çfarë është kjo, lojë fëmijësh? Le t’i respektojmë edhe profesionistët, ashtu siç e respektojmë ne ekipin e arbitrave”, përfundoi trajneri i PSG-së.