Ngjarje e rëndë në Pejë: 13-vjeçarja lajmëron në polici babanë e saj për ngacmim seksual dhe shfaqje të pornografisë

Një ngjarje tejet e rëndë trondit qytetin e Pejës, pasi një e mitur 13-vjeçare ka denoncuar në organet e rendit babanë e saj, duke e akuzuar për ngacmim seksual dhe ekspozim ndaj materialeve pornografike. Denoncimi zyrtar është regjistruar më 2 nëntor, rreth orës 16:00, ndërsa shqetësimet dhe dyshimet e ngritura i referohen situatave të ndodhura më parë. Referuar të dhënave, prindërisht të vajzës kanë qenë të ndarë dhe ajo vizitonte herë pas here të atin. Gjatë bisedës me zyrtarët kompetentë, e zhvilluar në mjedise dhe kushte të përshtatshme mbrojtëse për fëmijët, e mitur ka rrëfyer se është përballur me forma të ndryshme të ngacmimit seksual. Përveç dëshmisë së viktimës, autoritetet kanë marrë në pyetje edhe nënën e saj, ndërsa vajza është dërguar menjëherë në një strehë të sigurt ku po merr kujdesin e nevojshëm nga institucionet përgjegjëse. Në kuadër të hetimeve, forcat e rendit kanë ndërmarrë një kontroll në shtëpinë e personit të dyshuar. Gjatë këtij operacioni, hetuesit kanë konfiskuar dy aparate telefonike dhe një kompjuter laptop, të cilat do të analizohen si prova materiale në këtë proces penal. I dyshuari është shoqëruar për në stacionin policor, ku gjatë seancës së intervistimit, në prani të avokatit të tij mbrojtës, ka preferuar të mbrohet në heshtje, duke mos dhënë ndonjë deklaratë. Me urdhër të Prokurorisë së Shtetit, ndaj të dyshuarit është shqiptuar masa e ndalimit prej 48 orësh. Ndërkohë, autoritetet kompetente po vazhdojnë hetimet për veprat penale “Materiale me përmbajtje të shfrytëzimit dhe keqpërdorimit seksual të fëmijëve” dhe “Sulmi seksual”.