Skandali në Austri: Kosovari merrte ndihma sociale ndërsa gëzonte pension dhe shtëpi në vendlindje

Një shtetas nga Kosova, banues në Austri, është përballur me pasoja të rënda ligjore pasi është zbuluar se ka përfituar padrejtësisht ndihma sociale, ndërkohë që zotëronte një banesë dhe merrte pension në Kosovë. Autoritetet vendase kanë ndërmarrë masa të menjëhershme ndaj tij, duke e detyruar të kthejë shumën prej rreth 9 mijë eurosh. Sipas të dhënave zyrtare, ky rast mashtrimi u zbulua gjatë inspektimeve rutinë në terren të ndërmarra nga administrata komunale në qytetin e Welsit. Burri në fjalë kishte fshehur pronësinë e shtëpisë dhe të ardhurat nga pensioni në vendlindje, duke mashtruar institucionet austriake. Përveç ndërprerjes së menjëhershme të asistencës financiare dhe ngritjes së kallëzimit penal, komuna i kërkoi kthimin e afër 9 mijë eurove, detyrim të cilin ai e shlyeu përmes pagesave me këste. Në të njëjtin qytet u zbulua edhe një rast i ngjashëm, ku një tjetër përfitues i ndihmës sociale nuk u gjet në adresën e tij gjatë kontrolleve të njëpasnjëshme, pasi qëndronte rregullisht për periudha të gjata në Turqi. Si pasojë, autoritetet i ulën në mënyrë retroaktive pagesat dhe ngritën gjithashtu padi kundër tij. Ndërkohë, në Kosovë kanë ekzistuar herë pas here dyshime dhe raportime se persona që jetojnë jashtë vendit vazhdojnë të përfitojnë nga skemat e ndihmës financiare dhe shtesat për fëmijë. Madje, në të kaluarën ka pasur thirrje publike nga ana e kryeministrit Albin Kurti që edhe diaspora të përfshihet në përfitimin e këtyre skemave shtetërore. Këto zhvillime kanë nxehur debatin politik në qytetin austriak të Linzit, veçanërisht pas zbulimeve të bujshme në Wels. Këshilltari për siguri nga Partia e Lirisë së Austrisë (FPÖ), Michael Raml, theksoi se këto ngjarje dëshmojnë domosdoshmërinë e ngritjes së një “task-force” të posaçme për luftimin e abuzimeve me ndihmat sociale. “Ndërsa Welsi, nën udhëheqjen e kryetarit të komunës, Andreas Rabl, kontrollon vazhdimisht dhe zbulon mashtrimet me ndihmën sociale, SPÖ-ja në Linz deri më tani e ka refuzuar kërkesën tonë për krijimin e një grupi të veçantë monitorues. Megjithatë, rastet konkrete në Wels tregojnë se sa të rëndësishme janë këto kontrolle në terren”, ka deklaruar Raml. Në korrik të vitit 2025, FPÖ kishte dorëzuar një mocion në këshillin komunal të Linzit për formimin e një grupi të specializuar mbikëqyrës, por nisma u rrëzua për shkak të votave të shumicës së përbërë nga SPÖ dhe të Gjelbrit. Sipas të dhënave të Ramlit, buxheti vjetor që Linzi ndan për ndihmën sociale kap shifrën e rreth 10 milionë eurove.