Ndryshohet vendndodhja e Erion Veliajt në burgun e Fierit, ja ku është akomoduar tani

Institucioni i Ekzekutimit të Vendimeve Penale në Fier ka ndërmarrë një hap të ri sa i përket trajtimit të kryebashkiakut të Tiranës, Erion Veliaj, duke e transferuar atë nga sektori A i paraburgimit drejt mjediseve spitalore të këtij institucioni. Sipas informacioneve zyrtare, ky vendim për zhvendosjen e tij brenda të njëjtit burg vjen në vijim të gjetjeve të bëra publike nga Komiteti Shqiptar i Helsinkit, si dhe pas pretendimeve të ngritura nga vetë kryebashkiaku se gjendja e tij shëndetësore nuk është vlerësuar siç duhet. Kujtojmë se gjatë kohës që mbahej në paraburgimin e Durrësit, Veliaj kishte pësuar lëndime në zonën e këmbës. Edhe pas transferimit të mëvonshëm në burgun e Fierit, ai kishte vijuar të shprehë shqetësimin se problematikat e tij shëndetësore nuk ishin marrë në konsideratë nga autoritetet kompetente. Ndërkohë, mbetet ende e paqartë nëse kjo lëvizje e fundit e administratës së burgut ka ndonjë lidhje institucionale me vizitën që ministri i Drejtësisë, Toni Gogu, zhvilloi në këtë institucion pak ditë më parë.