Avdullah Hoti kritikon qeverinë: Vetëm 37 për qind e buxhetit u realizua për nëntë muaj

Deputeti i Lidhjes Demokratike të Kosovës (LDK), Avdullah Hoti, ka adresuar kritika të ashpra ndaj ekzekutivit për dështimin në shfrytëzimin e mjeteve buxhetore të parapara për investime kapitale gjatë periudhës janar-shtator të këtij viti. Nëpërmjet një shkrimi të publikuar në llogarinë e tij në “Facebook”, ish-kryeministri ka bërë të ditur se pavarësisht numrit të madh të tenderëve të lidhur me negocim, në nëntë muajt e parë të këtij viti është arritur të shpenzohet vetëm 37% e fondit total për investime kapitale. Sipas të dhënave të paraqitura nga Hoti, nga gjithsej 1.02 miliardë euro të planifikuara këtë vit për këtë qëllim, janë realizuar vetëm 377 milionë euro. Ai ka vlerësuar se shuma e mbetur prej 643 milionë eurosh vështirë se do të mund të shpenzohet në pjesën e mbetur të vitit. “Në shumën e shpenzuar prej 377 milionë eurosh përfshihen edhe 82 milionë euro për faqe për vendimin e gjykimit, duke i ulur investimet kapitale në 295 milionë euro,” ka theksuar ndër të tjera deputeti i opozitës. Në fund, ish-kreu i ekzekutivit ka paraqitur një pasqyrë të investimeve kapitale sipas dikastereve qeveritare, duke cilësuar nivelin e realizimit të tyre si tejet të ulët në raport me shpenzimet e planifikuara.