Tragjeditë hekurudhore tronditin Spanjën: Ministri i Transportit jep dorëheqjen pas humbjes së dhjetëra jetëve

Ministri i Transportit i Spanjës, Oscar Puente, ka bërë të ditur se do të lërë postin e tij ministerial, pas ndodhjes së dy fatkeqësive të rënda hekurudhore brenda një periudhe më të shkurtër se një vit, të cilat u morën jetën dhjetëra qytetarëve. Puente ka bërë të ditur se vendimin për këtë largim e kishte marrë qysh në çastet e para pas aksidentit tragjik të 28 tetorit, ku humbën jetën 69 persona. Megjithatë, ai kishte zgjedhur të qëndronte në detyrë për të menaxhuar pasojat e rënda dhe për të marrë masa që incidente të tilla të mos përsëriten në të ardhmen. “Një ministër i Transportit në një vend si Spanja nuk mund të vazhdojë në detyrë pas dy aksidenteve të kësaj shkalle brenda më pak se një viti. Është çështje dinjiteti politik, konsistence dhe empatie me viktimat”, u shpreh Puente, duke sqaruar se ende nuk ka caktuar një datë të saktë për largimin e tij zyrtar. Kryeministri spanjoll, Pedro Sanchez, ka vlerësuar lart vendimin e ministrit, duke e cilësuar si një akt përgjegjësie, ku Puente fillimisht ofroi zgjidhje për situatën dhe më pas vendosi të tërhiqet nga pozita e tij në shenjë respekti të thellë ndaj viktimave. Aksidenti i fundit hekurudhor u regjistrua pranë qytetit Urda, në pjesën qendrore të Spanjës, si pasojë e një avarie në sistemin e sinjalizimit. Ndërkohë, në muajin janar të këtij viti, në linjën hekurudhore mes Madridit dhe Seviljes, 46 persona humbën jetën pasi një tren doli nga shinat dhe u përplas me një tjetër. Situata rreth sigurisë hekurudhore është bërë edhe më alarmante pas një tjetër incidenti të regjistruar të martën afër Barcelonës, ku tre vagonë u përplasën me një lokomotivë, duke lënduar makinistin. Si kundërpërgjigje ndaj këtyre dështimeve në siguri, sindikatat e sektorit hekurudhor kanë paralajmëruar një grevë gjithëpërfshirëse për datën 17 nëntor, përmes së cilës kërkojnë implementimin e masave urgjente dhe më të rrepta për mbrojtjen e pasagjerëve dhe punonjësve në transportin hekurudhor.