Formë e shkëlqyer: Trepça synon kreun e grupit ndaj gjigantit gjerman Trier në FIBA Europe Cup

Kampionia e Kosovës, Trepça, do të zhvillojë mbrëmjen e sotme një nga sfidat më të rëndësishme në kuadër të FIBA Europe Cup, ku do të matë forcat me skuadrën e njohur gjermane, Trier, në një përballje që vlen kreun e renditjes në grup. "Xehetarët" po kalojnë në një periudhë tejet pozitive si në skenën vendore ashtu edhe në atë ndërkombëtare, duke numëruar shtatë ndeshje radhazi pa shijuar humbjen. Humbja e fundit për mitrovicasit daton që nga 7 tetori kundër Promitheas me shifrat 77-91, pas së cilës ata regjistruan fitore rresht ndaj Vëllaznimit, Borës, Yllit dhe së fundmi ndaj Sigal Prishtinës në Superligën e Kosovës. Në arenën evropiane, rrugëtimi i tyre ka qenë gjithashtu mbresëlënës, duke triumfuar ndaj Splitit në Kroaci (69-78), duke mposhtur Opavan në palestrën e tyre (89-80) dhe duke arritur një fitore bindëse në udhëtim ndaj Batumit në Gjeorgji (70-91). Falë kësaj ecurie prej tri fitoresh rresht, skuadra kosovare mban vendin e dytë në tabelën e grupit, pozicion ky që dërgon direkt në fazën tjetër të FIBA Europe Cup. Megjithatë, ambiciet e mitrovicasve janë rritur dhe tani synojnë vendin e parë – një objektiv i vështirë, por plotësisht i arritshëm. Për momentin, ky pozicion mbahet pikërisht nga gjermanët e Trierit, të cilët pas katër ndeshjeve të zhvilluara kryesojnë grupin si të pamposhtur me tetë pikë në llogari. Gladiators Trier është një klub me histori në basketbollin gjerman, rrënjët e të cilit datojnë që nga viti 1956 si pjesë e TV Germania Trier. Pas ngjitjes në Bundesligën e parë në vitin 1990, skuadra u shndërrua në një faktor kyç, ndërsa periudha e tyre e artë u shënua nën drejtimin e trajnerit Don Beck, duke fituar Kupën e Gjermanisë më 1998 dhe 2001. Pas sfidave financiare të klubit pararendës TBB Trier në vitin 2015, u themelua entiteti i ri Gladiators Trier, për të ruajtur gjallë traditën e basketbollit në këtë qytet. Pas një dekade në divizionin e dytë, skuadra u rikthye me bujë në elitën e basketbollit gjerman për edicionin 2025, pasi fitoi titullin e ProA-së. Ngjashëm me Trepçën, edhe Trieri po shfaq një formë fenomenale në këtë fillim sezoni, duke regjistruar vetëm dy humbje në 11 ndeshjet e para të zhvilluara në të gjitha garat zyrtare. Ata u eliminuan nga Eintracht Frankfurt në 1/8 e finales së Kupës së Gjermanisë, ndërsa humbjen e dytë e pësuan nga Braunschweig në xhiron inauguruese të Bundesligës. Pas gjashtë ndeshjeve të para në BBL, Trieri renditet i dyti me pesë fitore dhe një humbje, vetëm një ndeshje më pak e luajtur krahasuar me liderin Bayern. Edhe në kuadër të FIBA Europe Cup, "Gladiatorët" po dominojnë bindshëm, duke mposhtur me diferencë të madhe çdo kundërshtar. Ata nisën me triumfin ndaj Batumit (92-59), vazhduan me fitoren ndaj Promitheas (83-87), mposhtën Splitin (100-80) dhe në ndeshjen e fundit shkatërruan Opavan me shifrat 80-103. Klubi gjerman përbëhet nga një përzierje lojtarësh amerikanë dhe gjermanë, ndërsa udhëhiqet nga trajneri Jacques Schneider, i cili ishte arkitekti i ngjitjes historike në elitë më 2025. Rosteri i tyre përfshin gjashtë amerikanë, pesë basketbollistë gjermanë dhe një lojtar nga Irani. Pikët kryesore të skuadrës vijnë nga Eli Brooks me mesatare prej 19 pikësh për ndeshje, Jordan Roland me 18.3 pikë, si dhe Austin Crowley me 11.3 pikë për lojë. Kjo përballje padyshim që do të përbëjë testin më të rëndësishëm për Trepçën në këtë edicion evropian. Një rezultat pozitiv në tokën gjermane do të rritte ndjeshëm shanset e mitrovicasve për të siguruar kreun e grupit dhe për të vazhduar ëndrrën në FIBA Europe Cup.