Incident i rëndë në Francë: Hakerët sulmojnë sistemin e ftohjes së gjakut dhe rrisin temperaturën në 110°C

Një sulm i sofistikuar kibernetik ka vënë në shënjestër infrastrukturën e kompanisë "Coolworld", e cila është përgjegjëse për mirëmbajtjen dhe monitorimin e kontejnerëve frigoriferikë dhe ngrirësve të Fondacionit Francez të Gjakut (EFS), institucion ku ruhen rezervat jetike të gjakut dhe plazmës. Sipas informacioneve të bëra publike nga e përjavshmja franceze "Le Canard enchaíné", ndërhyrja e paautorizuar ka ndodhur gjatë natës së së dielës deri në orët e para të së hënës. Autorët e sulmit kanë depërtuar në sistemet e kontrollit të temperaturës, duke shfrytëzuar një dobësi në sigurinë e pajisjeve të "Coolworld", gjë që solli rritjen ekstreme të temperaturës në njësitë e ruajtjes së mostrave deri në 110 gradë Celsius. Në kushte normale funksionimi, këto njësi ruajtjeje duhet të mbahen në një temperaturë konstante prej -30 gradë Celsius, me qëllim garantimin e sigurisë dhe cilësisë së mostrave të dhuruara nga qytetarët. Fatmirësisht, incidenti u zbulua në fazat e para të tij falë vigjilencës së një tekniku në detyrë, i cili vuri re anomalinë e temperaturës gjatë orëve të natës, duke bërë të mundur parandalimin e një katastrofe më të madhe. Ministria Franceze e Shëndetësisë ka dalë me një deklaratë qetësuese, duke konfirmuar se ky sulm nuk ka pasur asnjë lloj ndikimi negativ në mbarëvajtjen e shërbimit, në zinxhirin e transfuzioneve dhe aq më pak te shëndeti i pacientëve, pikërisht falë reagimit në kohë. Nga ana e tij, Fondacioni Francez i Gjakut (EFS) ka saktësuar se mostrat që ndodheshin në ato mjedise ishin pjesë e një sistemi specifik të monitorimit shëndetësor që lidhet ngushtë me procedurat e transfuzionit të gjakut. Ky incident shqetësues ndodh vetëm pak javë pas një tjetër sulmi kibernetik të ngjashëm, i cili pati si shënjestër sistemet e ftohjes së supermarketeve në territorin francez, megjithëse autoritetet ende nuk kanë konfirmuar ndonjë lidhje zyrtare mes dy ngjarjeve.