Perspektiva e anëtarësimit: Berlini pret ministrin shqiptar, vendi ynë kërkon proces të bazuar te meritokracia

Ministri për Evropën dhe Punët e Jashtme, Ferit Hoxha, ka marrë pjesë në një konferencë të rëndësishme ndërkombëtare të organizuar në kryeqytetin gjerman nga Këshilli Gjerman për Marrëdhëniet me Jashtë (DGAP), e cila kishte në fokus zgjerimin e Bashkimit Europian dhe horizontin e vitit 2027. Në fjalën e mbajtur gjatë këtij aktiviteti, kryediplomati shqiptar vuri në dukje se rrethanat aktuale gjeopolitike e kanë kthyer procesin e zgjerimit në një domosdoshmëri parësore për sigurinë dhe strategjinë e kontinentit. Megjithatë, ai bëri të qartë se kjo nuk nënkupton anashkalim të standardeve apo ulje të kritereve, pasi transformimet rrënjësore mbeten jetike. "Ne nuk po bëjmë reforma thjesht për t’u bërë europianë por sepse jemi Europianë dhe sepse qytetarët tanë meritojnë institucione që funksionojnë sipas standardeve europiane", deklaroi ndër të tjera Hoxha. Sipas shefit të diplomacisë shqiptare, Tirani zyrtare nuk është në kërkim të asnjë shortcut-i apo rruge alternative për t'u bërë pjesë e bllokut europian. "Anëtarësimi në BE fitohet me meritë, nuk dhurohet si akt solidariteti. Fitohet reformë pas reforme, kapitull pas kapitulli, standard pas standardi, duke ndërtuar institucione funksionale, demokratike dhe të përgjegjshme, për të cilat Shqipëria ka nevojë për veten e saj dhe që anëtarësimi në BE kërkon. Shqipëria po bën pikërisht këtë: reforma, zbatim, llogaridhënie dhe vlerësim mbi bazën e meritës. Por një proces i bazuar në meritë duhet të funksionojë në të dyja drejtimet. Kur vendet kandidate japin rezultate, Europa duhet të përgjigjet. Kur reformat sjellin rezultate, ato duhet të përkthehen në progres konkret", u shpreh ministri. Në përmbyllje të fjalës së tij, ai theksoi se zgjerimi nuk synon vetëm një Bashkim Europian me përmasa më të gjera, por mbi të gjitha synon një Europë të pajisur me më shumë forcë, siguri dhe përfundimisht të bashkuar në tërësinë e saj.