Nëntori nis me shira rekord, meteorologu Mendim Rugova zbulon çfarë na pret në fundjavë

Muaji nëntor është shoqëruar me reshje të konsiderueshme shiu gjatë ditëve të para, sipas një përmbledhjeje të situatës meteorologjike të paraqitur nga eksperti i fushës, Mendim Rugova. Ai ka bërë të ditur se deri më tani janë regjistruar rreth 20 milimetra reshje, shifër kjo që përbën afërsisht një të tretën e sasisë totale të parashikuar për të gjithë muajin nëntor. “Gjatë këtyre ditëve të nëntorit janë shënuar rreth 20 milimetra që janë akumuluar në këto ditë të para, një e treta e reshjeve për muajin nëntor. Ka filluar mirë nëntori. Fillimisht shkojmë te fushat barike. Kemi pasur stuhinë Agneta, e cila është emërtuar nga Shërbimi Ushtarak Meteorologjik i Italisë dhe ka sjell mjaft shumë të reshura, sidomos ka pasur vërshime në pjesën jugore të Italisë dhe në Greqi”, ka deklaruar Rugova. Sa i përket ecurisë së motit në vijim, meteorologu ka shpjeguar se sistemi i stuhisë që ka prekur rajonin tonë po tërhiqet gradualisht dhe po lëviz drejt lindjes, duke u drejtuar nga Deti i Zi dhe më tej drejt Rusisë Perëndimore. Në anën tjetër, masat e ajrit me presion të lartë atmosferik nga rajonet veriore po shtrihen drejt jugut, ndikimi i të cilave pritet të ndihet në vendin tonë qysh në prag të fundjavës. “Për ditët e ardhshme, kjo stuhi që po largohet, ka kaluar ai syri i ciklonit i ditëve të kaluara, pasi po zhvendoset në lindje dhe pritet të kalojë nga Deti i Zi edhe më thellë kah Rusia Perëndimore. Tash, prej zonave më veriore ku janë instaluar fushat e presionit të lartë, kemi fusha që po zhvendosen më kah jugu dhe që pritet nga fundjava të na afektojnë edhe neve. Po pritet një përmirësim i përkohshëm i motit”, ka thënë ai. Ndërkohë, për javën e ardhshme parashikohet depërtimi i mundshëm i një cikloni nga Atlantiku, i cili do të favorizojë depërtimin e rrymave më të ngrohta ajrore në rajon, duke sjellë kështu një rritje të ndjeshme të temperaturave, ka përfunduar meteorologu Mendim Rugova.