Tensionet në Ngushticën e Hormuzit: Katër cisterna nafte kaplohen nga flakët pas shpërthimit të minave detare

Ngushtica e Hormuzit është përfshirë nga një përshkallëzim i rrezikshëm situate, pasi autoritetet iraniane njoftuan të mërkurën se katër anije cisterna nafte janë djakur plotësisht si pasojë e goditjes së minave gjatë tentativës për të kaluar këtë zonë strategjike. Ngjarja vjen vetëm një ditë pasi Presidenti i SHBA-së, Donald Trump, deklaroi se Shtetet e Bashkuara kishin ndërmarrë sulme ndaj Republikës Islamike, në vazhdën e njoftimeve për një sulm në ishullin Qeshm, i cili është më i madhi në këtë ngushticë. Nëpërmjet një deklarate zyrtare të transmetuar nga televizioni shtetëror, Trupa e Gardës Revolucionare Islamike e Iranit sqaroi se “katër anije cisternash nafte që nuk përmbushnin rregullat, të cilat përpiqeshin të kalonin nëpër kalimin e ndaluar në jug të Ngushticës së Hormuzit, u shkatërruan pasi goditën mina detare dhe ende digjen”. Gjithashtu, në të njëjtën deklaratë u bë e ditur se dy mjete të tjera lundruese që nuk respektonin normat e vendosura janë ndaluar nga forcat iraniane, të cilat pretendojnë se kanë rrëzuar edhe një dron mbi hapësirën e ngushticës. Teherani ruan pretendimet e tij për kontrollin e plotë mbi Hormuzin, që përbën një arterie jetike për energjinë në nivel global, duke marrë në shenjë çdo anije që kërkon të lundrojë pa lejen e tij që prej nisjes së konfliktit. Ky armiqësim, i cili nisi pas sulmeve amerikano-izraelite ndaj Iranit gjatë muajit shkurt, kishte hyrë në një fazë ngërçi prej muajsh, ndërkohë që bisedimet indirekt mes Uashingtonit dhe Teheranit përmes palëve ndërmjetësuese nuk kanë sjellë ndonjë zhvillim domethënës diplomatik. Ndonëse Irani është shprehur i hapur për rihapjen e ngushticës, kjo kushtëzohet nga pranimi i një liste kërkesash paraprake nga ana e Uashingtonit. Kryenegociatori i Teheranit në dialogun me Shtetet e Bashkuara, Mohammad Bagher Ghalibaf, theksoi se Republika Islamike mbetet “e gatshme për betejë me gishtin në këmbëz”, ndërsa nga ana tjetër, Presidenti Masoud Pezeshkian theksoi se administrata e tij mbetet e angazhuar për t'i dhënë zgjidhje krizës “përmes dialogut”. Të martën, kreu i shtetit iranian paralajmëroi se “askush nuk do të përfitojë nga kjo luftë” nëse dhuna rifillon përsëri.