Tërheqja e fondeve në Manastir: Banka Popullore njofton procedurat për klientët e ALTA Bank pa kartela

Banka Popullore ka njoftuar të gjithë qytetarët që zotërojnë llogari pagese në ALTA Banka AD Bitola, por që nuk janë të pajisur me kartela bankare, se duke filluar nga dita e enjte, 5 nëntor 2026, do të mund të bëjnë tërheqjen e mjeteve financiare direkt nga sportelet e degës kryesore të kësaj banke në qytetin e Manastirit. Për të lehtësuar këtë proces, institucioni bankar ka bërë të ditur se do të vërë në funksion disa sportele të posaçme në adresën rruga "Dobrivoje Radosavljeviç" nr. 21 në Manastir. Sipas njoftimit zyrtar, kjo mundësi u dedikohet në veçanti pensionistëve dhe përfituesit e skemave të ndihmës sociale, të cilët i marrin fondet përmes kësaj banke por nuk posedojnë kartela. Qytetarët do të kenë mundësinë të tërheqin një shumë deri në 20,000 denarë, e cila paraqet kufirin maksimal të lejuar për të tërhequr brenda një periudhe dyjavore. Duke filluar nga data 6 nëntor, duke përfshirë edhe ditën e shtunë, 7 nëntor, dega bankare do të operojë me orar të zgjeruar në dy ndërrime, me qëllim që t'u shërbejë sa më efektivisht qytetarëve. Shpërndarja e mjeteve do të kryhet përgjatë disa ditëve sipas një grafiku të caktuar, për të cilin klientët do të njoftohen nëpërmjet mesazheve telefonike (SMS), ku do të specifikohet dita dhe ora e saktë e paraqitjes në filialë. "U bëjmë thirrje qytetarëve që t'i përmbahen rreptësisht termineve të caktuara dhe të mos paraqiten në filialë jashtë orarit të tyre ose në ditët kur nuk janë njoftuar me SMS, kjo me qëllim që të evitohen grumbullimet e panevojshme dhe pritjet e gjata", thuhet në deklaratën e Bankës Popullore. Në rastet kur disa nga përfituesit nuk do të kenë mundësi të paraqiten në orarin e caktuar, institucioni ka siguruar se do të caktohen termine shtesë për ta. Gjithashtu, theksohet se këto sportele do të funksionojnë ekskluzivisht për tërheqjen e parave të gatshme dhe në to nuk do të realizohen transaksione të tjera bankare. Banka Popullore ka bërë të ditur gjithashtu se po bëhen përgatitjet e nevojshme për hapjen e sporteleve të ngjashme për pensionistët dhe kategoritë e ndihmës sociale edhe në qytete të tjera të vendit, për çka publiku do të njoftohet në një kohë të afërt.