Valë alarmante sulmesh kibernetike godet supermarketet në 11 vende të Evropës, BE kërkon reagim urgjent

Një seri sulmesh kibernetike ka vënë në shënjestër supermarketet në të paktën 11 shtete evropiane, duke shkaktuar prishjen e sasive të mëdha të ushqimeve dhe duke alarmuar Bashkimin Evropian, i cili ka bërë thirrje për një përgjigje të koordinuar. Sipas informacioneve të bëra publike, autorët e sulmeve kanë arritur të depërtojnë në sistemet e ftohjes së marketeve, duke manipuluar nga distanca dhe ngritur temperaturat e frigoriferëve dhe ngrirësve. Autoritetet në Gjermani, Rumani dhe Mbretërinë e Bashkuar kanë raportuar për incidente të reja gjatë ditës së marte, ndërsa një ditë më parë goditje të ngjashme u regjistruan në Belgjikë, Estoni, Finlandë, Irlandë, Itali, Luksemburg, Holandë, Portugali dhe Suedi. Bilanci i dëmeve përfshin 4 supermarkete të prekura në Gjermani dhe 6 në Rumani. Ndërkohë, në Belgjikë dhjetëra dyqane kanë shfaqur defekte në sistemet e ftohjes, kurse në Itali numri i marketeve të goditura arrin në rreth 20. Zëdhënësi i Bashkimit Evropian, Thomas Regnier, u shpreh se strukturat evropiane janë në kontakt të ngushtë me autoritetet kombëtare për të organizuar një kundërpërgjigje efikase. “Këto nuk janë incidente të izoluara dhe, natyrisht, duhet të jemi kolektivisht të qëndrueshëm dhe të përgatitur për incidente të tilla kibernetike”, u shpreh Regnier. Në Suedi, ndërhyrja kibernetike bëri që temperatura e ngrirësve në një supermarket të shkonte deri në 50 gradë Celsius, duke i detyruar punonjësit të asgjësonin sasi të konsiderueshme ushqimesh. Në Itali, Giuseppe Spadaro, drejtues i një grupi që menaxhon supermarketet e rrjetit Coop në Sicili, konfirmoi se 4 dyqane kanë pësuar dëme që kapin vlerën e mijëra eurove. “Na është dashur të hedhim gjithçka. Raftet janë bosh”, deklaroi ai për median italiane. Qeveria italiane ka zhvilluar takime urgjente me krerët e shërbimeve të inteligjencës dhe Agjencisë Kombëtare të Sigurisë Kibernetike. Zyra e kryeministres Giorgia Meloni njoftoi se ndikimi i sulmeve ka qenë i kufizuar, por strukturat shtetërore mbeten në gjendje gatishmërie. Në Mbretërinë e Bashkuar, hakerët tentuan të sulmonin edhe biznese të vogla të përpunimit të mishit, ndonëse pasojat ishin minimale. Dan Cimpean, drejtor i Drejtorisë Kombëtare për Siguri Kibernetike të Rumanisë, theksoi se deri më tani nuk ka dyshime për përfshirjen e ndonjë shteti pas këtyre akteve. “Duket disi amatoreske. Nuk dyshojmë, në asnjë rrethanë, se bëhet fjalë për një aktor shtetëror”, u shpreh ai. Për momentin, autoritetet evropiane nuk kanë mundur të identifikojnë autorët dhe motivet e këtyre sulmeve, të cilat vijnë pas një valë të ngjashme që goditi qindra supermarkete në Francë gjatë muajit tetor.