Marrëveshja u mbyll, Barcelona gati ta zyrtarizojë rinovimin e yllit brazilian këtë të enjte

Klubi i Barcelonës është gati që këtë të enjte të zyrtarizojë zgjatjen e kontratës me Raphinhan, pas një periudhe pritjeje të kushtëzuar nga kalendari i ngarkuar i skuadrës. Marrëveshja mes palëve ishte arritur më herët, ku drejtori sportiv Deco dhe sulmuesi brazilian patën një takim përfundimtar në Castelldefels, takim ky që u pasua edhe nga konfirmimi zyrtar i vetë Decos. Nëse zyrtarizimi është vonuar deri më tani, kjo ka ndodhur ekskluzivisht për shkak të vështirësisë në harmonizimin e agjendave dhe jo prej ndonjë mosmarrëveshjeje të mundshme mes klubit dhe lojtarit. Data e kësaj të enjteje është përzgjedhur si momenti perfekt, duke qenë se katalanasit do të kenë një ditë pushimi pas sfidës së Ligës së Kampionëve kundër Aston Villës. Kjo do t'i japë mundësi institucionit të organizojë ceremoninë e duhur para se grupi t'i rikthehet seancave stërvitore për përballjen e së dielës ndaj Atletico Madridit. Ky hap i rëndësishëm vjen në një periudhë fantastike për 29-vjeçarin, i cili vetëm një natë më parë ishte protagonist absolut me dy gola të shënuar në triumfin evropian ndaj skuadrës angleze. Përveç kontributit direkt para portës, Raphinha ka rënë në sy për sakrificën, presingun e lartë dhe punën e palodhshme në fushë. Si një prej kapitenëve të skuadrës, ai gëzon një autoritet të padiskutueshëm në dhomat e zhveshjes, duke shërbyer si pikë referimi për talentet e reja. Trajneri Hansi Flick e çmon jashtëzakonisht shumë etikën e tij të punës, ndërsa hierarkia e klubit e vlerëson si fat të madh praninë e një lojtari me këtë pjekuri dhe rendiment të lartë. Nga ana e tij, anësori brazilian ka dëshmuar vazhdimisht besnikëri ndaj projektit sportiv të katalanasve, duke shfaqur hapur dëshirën e tij për të vazhduar rrugëtimin në “Camp Nou”. Tashmë gjithçka është gati dhe mungojnë vetëm hedhja e firmës në kontratë dhe shkrepja e fotografisë zyrtare, me të enjten që pritet të vulosë përfundimisht këtë bashkëpunim, në mungesë të ndonjë kthese të papritur të minutës së fundit.