Mancini për akuzat ndaj Manchester Cityt: Nuk është problemi im

Roberto Mancini ka reaguar për herë të parë ndaj zhvillimeve të fundit në rastin financiar të Manchester Cityt, duke u distancuar nga akuzat që lidhen me periudhën e tij si trajner i klubit. Një komision i pavarur raportohet se e ka shpallur Manchester Cityn fajtor për 114 nga 115 akuzat e ngritura nga Premier League për shkelje të rregullave financiare. Megjithatë, vendimi i plotë dhe sanksionet ndaj klubit ende nuk janë bërë publike zyrtarisht. Në mesin e akuzave janë edhe pretendimet për mosraportim të saktë të pagesave ndaj lojtarëve dhe trajnerëve gjatë periudhës 2009–2018. Kjo përfshin edhe vitet kur Mancini drejtonte Cityn, nga dhjetori i vitit 2009 deri në maj të vitit 2013. I pyetur për pretendimet se kishte një “kontratë të dyfishtë” gjatë kohës së tij në Manchester, italiani u shpreh qartë se nuk e konsideron çështje të tijën. “Nuk është një çështje që më shqetëson. Kjo nuk është diçka e re, sepse është diskutuar gjatë katër apo pesë viteve të fundit.” Mancini shtoi:“Manchester City nuk është shpallur fajtor dhe kontrata e pretenduar e dyfishtë nuk është shqetësimi im. Është çështja e tyre, jo e imja.” Pretendimet për kontratën e Mancinit lidhen me raportime të mëhershme se një pjesë e kompensimit të tij mund të ishte paguar përmes një marrëveshjeje konsulence me klubin nga Abu Dhabi, Al Jazira. Sipas raportimeve, bëhej fjalë për rreth 1.75 milionë funte në vit, përveç pagës së tij si trajner i Cityt. Mancini drejtoi Manchester Cityn në një periudhë historike për klubin, duke fituar FA Cup në vitin 2011 dhe Premier Leaguen në vitin 2012, trofeu i parë kampion në Angli për Cityn pas 44 vitesh. Ndërkohë, Manchester City vazhdon të mohojë akuzat. Kryetari Khaldoon Al Mubarak ka deklaruar se klubi mbetet i bindur se do të provojë pafajësinë e tij, ndërsa procesi ligjor ende nuk ka përfunduar.