Interesi i fshehtë i Barcelonës: Prapaskenat e tratativave për Lautaro Martínez

Përpjekjet e Barcelonës për të siguruar shërbimet e sulmuesit Lautaro Martínez shënuan orët e fundit të sesionit veror të transferimeve për skuadrën e Interit. Pasi Atletico Madrid refuzoi në mënyrë të prerë çdo mundësi për shitjen e Julián Álvarez, drejtuesit katalanas e zhvendosën fokusin te sulmuesi argjentinas, i njohur ndryshe si ‘El Toro’. Sulmuesi nga Argjentina ishte piketuar si zëvendësuesi afatgjatë i Robert Lewandowski, ndonëse drejtuesit zikaltër nuk e morën asnjëherë në konsideratë largimin e kapitenit të tyre. Megjithatë, siç kishte lënë të kuptonte vetë lojtari dhe konfirmoi së fundmi drejtori sportiv Deco, kontaktet dhe diskutimet kanë qenë sa më reale. “Lautaro është një lojtar spektakolar, një idhull i Interit, kapiteni i klubit dhe një legjendë,” u shpreh zyrtari i klubit ‘blaugrana’. Gjatë rrëfimit të tij, ish-mesfushori portugez hodhi dritë mbi bisedimet, të cilat nuk arritën kurrë të merrnin një trajtë zyrtare apo të avanconin. “Në shenjë respekti për të dhe për vetë klubin, sapo kuptuam se ata nuk ishin të gatshëm të nisnin negociatat, ne u tërhoqëm menjëherë pa e zgjatur më tej. Ne përpiqemi gjithmonë t'i menaxhojmë gjërat me korrektësi dhe transparencë maksimale,” theksoi Deco. Pavarësisht kësaj, drejtori sportiv i Barçës konfirmoi se profili i ‘El Toro’ gëzon vlerësim maksimal në radhët e klubit katalanas: “Në momentin që ishim në kërkim të një sulmuesi me tiparet e duhura për skemat tona, Lautaro ishte pa dyshim pjesë e listës sonë të ngushtë”. “Sapo krerët e të dyja klubeve biseduan dhe u bë e qartë se Interi nuk kishte ndërmend ta lejonte largimin e tij, ne hoqëm dorë nga kjo pistë, duke treguar respektin e duhur për të gjithë palët e përfshira,” shtoi ai. Në fjalën e tij, Deco sqaroi se nuk pati kontakte direkte me futbollistin apo përfaqësuesit e tij, por nuk e fshehu admirimin: “Nuk folëm as me lojtarin, e as me agjentin e tij. Por e përsëris: ne e kemi ndjekur dhe e vlerësojmë jashtëzakonisht shumë si lojtar”. Ky vlerësim i hapur lë vend për aludime rreth lëvizjeve të mundshme të Barcelonës në sesionet e ardhshme të merkatos.