Incident në fluturimin drejt Moskës: Aeroplani me Aleksandar Vulinin detyrohet të kthehet në Beograd

Një ngjarje e pazakontë ka ndodhur mbrëmjen e së martës, më 3 nëntor, kur një aeroplan i kompanisë 'Air Serbia', që po udhëtonte drejt Moskës, u detyrua të kthehej mbrapsht në kryeqytetin serb. Në bordin e këtij fluturimi, i cili ishte nisur nga aeroporti 'Nikola Tesla' në orën 18:48, ndodhej edhe kryetari i Lëvizjes Socialiste, Aleksandar Vulin. Fluturimi me kodin JU134 kishte arritur deri mbi hapësirën ajrore të Lituanisë kur mori urdhrin për t'u kthyer në Beograd. Shkak për këtë ndërhyrje u bënë dyshimet se njëri prej pasagjerëve, konkretisht Vulin, kishte hyrë në aeroplan pa iu nënshtruar protokolleve të detyrueshme të sigurisë. Sipas informacioneve, drejtori i sigurisë korporative të aeroportit, Millan Kuç, kishte shqyrtuar pamjet e kamerave të sigurisë, duke konstatuar shkeljen e procedurave dhe duke urdhëruar kthimin e menjëhershëm të mjetit fluturues. Megjithëse ekzistojnë pretendime se dikush mund ta ketë ndihmuar Vullinin të shmangte kontrollet, këto informacione ende nuk janë konfirmuar zyrtarisht. Nga ana e saj, kompania 'Air Serbia' deklaroi se vendimi për kthim u mor pas njoftimeve nga shërbimet e aeroportit për nevojën e verifikimeve shtesë të sigurisë për një pasagjer, duke theksuar se veprimi ishte në përputhje të plotë me rregulloret e aviacionit, pa specifikuar identitetin e personit në fjalë. Vetë Vulin, në një prononcim për televizionin 'Informer', ka treguar versionin e tij të ngjarjes, duke pretenduar se nuk ishte në dijeni të situatës pasi ishte në gjumë. 'U zgjova dhe më thanë se jemi kthyer në Beograd. Pashë policinë dhe njësitë speciale të mbledhura', deklaroi ai, duke mohuar çdo parregullsi dhe duke shtuar se iu nënshtrua kontrolleve pas kthimit, ku nuk u gjet asgjë e dyshimtë. Sipas Vulinit, ky ishte një udhëtim zyrtar me qëllim diskutimet për furnizimin me gaz të Serbisë. Në të njëjtin fluturim raportohet se ndodheshin edhe Dushan Bajatoviq, drejtor i 'Srbijagas', si dhe Nenad Popoviq, kryetar i Partisë Popullore Serbe. Ngjarja ka nxitur reagime të shumta në opinionin publik, përfshirë edhe pyetjet e ngritura nga kryetari i Partisë Demokratike, Sërxhan Millivojeviq, mbi qëllimin e këtij udhëtimi të zyrtarëve serbë drejt Rusisë.