Rrëfimi rrëqethës i gruas që humbi dy vëllezërit nga dora e ish-bashkëshortit: Jetojmë në terror të vazhdueshëm

N.N., gruaja e cila përjetoi tragjedinë e vrasjes së dy vëllezërve të saj nga ish-bashkëshorti një vit më parë, ka thyer heshtjen përballë publikut. Në një rrëfim ekskluziv, ajo ka treguar se pas këtij krimi makabër, ajo dhe fëmijët e saj vazhdojnë të jenë shënjestër e kërcënimeve të vazhdueshme nga familjarët e agresorit. Në një intervistë për emisionin “Debat Plus”, ajo ka shpalosur detaje mbi mungesën e reagimit institucional, duke theksuar se frika është bërë pjesë e përditshmërisë së tyre. N.N. kujtoi kohën kur pas denoncimit të dhunës, ajo u kthye në shtëpinë e ish-bashkëshortit, e shtyrë nga premtimet e avokatit dhe zotimet e rreme të burrit se dhuna nuk do të përsëritej, vendim ky i marrë kryesisht për hir të fëmijëve. Sipas dëshmisë së saj, institucionet nuk ofruan asnjë lloj mbrojtjeje pas denoncimeve, madje as urdhër mbrojtës nuk u lëshua, pavarësisht se dhuna ushtrohej edhe nga anëtarë të tjerë të familjes së ish-bashkëshortit. “Po të kishte pasur mbrojtje, nuk do të kishte ardhur puna deri te vrasja. Askush nuk e mori seriozisht këtë rast”, u shpreh ajo me hidhërim. Duke përshkruar momentin tragjik, ajo tregoi se ngjarja ndodhi pas vdekjes së babait të saj. Ish-bashkëshorti e kishte kontaktuar dhe ishte shfaqur papritur te shtëpia ku ajo po qëndronte. Kur vëllai i saj i vogël doli për të biseduar dhe për të qetësuar situatën, ai u përball me armën e ish-bashkëshortit. Pasi vrau vëllain e vogël, agresori qëlloi për vdekje edhe vëllain tjetër, gjithçka në sy të fëmijëve dhe familjarëve të tjerë. N.N. shprehet se ky krim ishte i planifikuar paraprakisht nga ish-bashkëshorti në bashkëpunim me një mik të tij. Pas tragjedisë, ajo është detyruar të shpërngulet për të gjetur strehim, duke vazhduar punën për të mbajtur familjen. Ndonëse fëmijët ndihen më të qetë pa praninë e babait të tyre abuziv, ata janë sërish të traumatizuar nga kërcënimet e shpeshta që vijnë nga familjarët e tij. “Nuk ndihemi të sigurt asnjë çast. Fëmijët kanë qenë të detyruar ta ndërpresin shkollën sepse familjarët e tij i ndjekin dhe i kërcënojnë nëpër rrugë”, ka deklaruar ajo. Ajo ka treguar se ka pasur raste kur personat në fjalë kanë tentuar t'ua marrin fëmijët nga shkolla, duke detyruar ndërhyrjen e policisë. Megjithatë, ajo pohon se shqetësimet nga kunetërit nuk kanë të ndalur, duke u shfaqur shpesh pranë banesës së saj. Për shkak të mosveprimit efikas të institucioneve pas denoncimeve të saj të shumta, N.N. ndihet e pashpresë, duke u shprehur se në disa raste ka hequr dorë nga raportimi, pasi nuk ka parë asnjë zgjidhje konkrete për sigurinë e jetës së saj dhe të fëmijëve.