Krasniqi shënjestron pushtetin: Institucionet janë kthyer në 'çiflig' familjar, premtimet për meritokraci u harruan

Ish-deputetja e Lidhjes Demokratike të Kosovës (LDK), Rrezarta Krasniqi, ka hedhur akuza të rënda ndaj qeverisë së udhëhequr nga Albin Kurti, duke e akuzuar atë për nepotizëm të shfrenuar në institucionet publike dhe përfaqësitë diplomatike të Kosovës. Sipas saj, ky realitet bie ndesh me zotimet e bujshme të kryeministrit gjatë fushatës zgjedhore të vitit 2021, ku premtohej transparencë dhe punësim përmes meritokracisë. Krasniqi ka reaguar ndaj zërave që e kritikojnë për qëndrimet e saj të ashpra opozitare, duke shtruar pyetjen se si mund të heshtet përballë fenomenit të punësimit të njerëzve të afërt në administratën shtetërore. Ajo ka rikujtuar premtimin e Kurtit, i cili dikur deklaronte se “kushërinjtë janë për dasma” dhe se ambasadat e ministritë nuk duhet të shndërrohen në strehë për farefisin. “Sot, institucionet e shtetit dhe misionet tona diplomatike janë mbushur me kushërinj, dajë, teze, halla, balldëska e baxhanakë, si asnjëherë më parë. Është vërtet e dhimbshme të shohësh se si shteti është shndërruar në një çiflig privat”, ka shkruar ish-deputetja. Në përmbyllje të reagimit të saj, Krasniqi ka theksuar se në një shoqëri me standarde normale, mbështetësit e kësaj qeverie, të cilët dikur kishin besim të verbër te këto premtime, sot do të duhej të distancoheshin dhe të shprehnin pakënaqësinë e tyre për këtë degradim të vlerave institucionale.