Rrëfimi rrëqethës i gruas që humbi dy vëllezërit nga dora e ish-bashkëshortit: 'Më urdhëronin të dhunohesha aty ku nuk shihen shenjat'

Një histori tronditëse dhune dhe tragjedie ka dalë në dritë nga N.N., gruaja e cila një vit më parë u përball me humbjen e dyfishtë të vëllezërve të saj, të vrarë nga ish-bashkëshorti. Në një rrëfim ekskluziv për emisionin “Debat Plus”, ajo ka ndarë detaje të rënda mbi jetën e saj të mbushur me tortura psikologjike dhe fizike, si dhe betejën e saj për drejtësi. Intervista, e realizuar në vendlindjen e saj në Gjakovë, shënon herën e parë që ajo vendos të thyejë heshtjen përballë publikut. Përveç përshkrimit të kërcënimeve të vazhdueshme, ajo ka hedhur dritë mbi dinamikën e tmerrshme familjare që e kishte shoqëruar për dy dekada me radhë gjatë martesës së saj. Sipas rrëfimit të saj, dhuna nuk ishte një rastësi, por një ritual i nxitur nga vjehrri i saj. Ajo ka shpjeguar se si i shoqi merrte urdhra të drejtpërdrejta nga i ati për ta keqtrajtuar atë, madje duke u instruktuar për mënyrat se si të shmangnin zbulimin e shenjave të dhunës. “Vjehrri e urdhëronte të birin që të më rrihte vetëm në ato pjesë të trupit ku nuk binte në sy, duke kërkuar që fytyra të mos prekej për të mos lënë gjurmë të dukshme”, ka dëshmuar ajo me hidhërim. Kjo formë e dhunës ishte bërë pjesë e përditshmërisë së asaj shtëpie. Ajo ka treguar se atmosfera ishte e mbushur me frikë, ku edhe vjehrra kishte qenë viktimë e bashkëshortit të saj. Çdo mbrëmje, kur burrat ktheheshin nga puna, shtëpia shndërrohej në një arenë dhune, pasi vjehrri i detyronte djemtë e tij që t’i rrihnin gratë dhe fëmijët me pretekstin e “zhurmës” që ata bënin, duke ushqyer një cikël të pafundëm keqtrajtimesh familjare.