Identifikimi i tri viktimave të luftës, Haxhiu kërkon përgjegjësi nga Serbia për krimet në Kosovë

Kryetarja e Kuvendit të Kosovës, Albulena Haxhiu, ka njoftuar se përmes analizave të fundit të ADN-së, të siguruara nga procesi i zhvarrosjeve në zonat e Kalludërës dhe Jabukës, është arritur të vërtetohet identiteti i tre personave që llogariteshin si të zhdukur që nga koha e luftës. Në një reagim të bërë publik, ajo ka bërë të ditur se Komisioni Qeveritar për Persona të Zhdukur ka pranuar rezultatet e ADN-së, të cilat konfirmojnë se mes mbetjeve mortore të zbuluara në këto lokacione gjenden edhe ato të Adem Ademit, Fatmir Fazliut dhe Ali Halitit, të cilët njiheshin si pjesëtarë të “Grupit të Intelektualëve”. Për më shumë se dy dekada e gjysmë, familjarët e tyre kanë jetuar në ankth duke kërkuar të vërtetën për fatin e më të dashurve të tyre, të cilët u ekzekutuan dhe u fshehën në varreza ilegale nga forcat serbe me synimin për të humbur çdo gjurmë të krimit. Duke u shprehur ngushëllimet më të thella familjeve Ademi, Fazliu dhe Haliti, Haxhiu ka theksuar se ndan dhimbjen jo vetëm me ta, por edhe me familjarët e tjerë të këtij grupi dhe mbarë shoqërinë në Kosovë që ende vazhdojnë të presin me ankth fatin e të dashurve të tyre të zhdukur me dhunë. Ajo ka kërkuar fuqishëm që Serbia të mbajë përgjegjësi ligjore e morale për mizoritë e kryera dhe të hapë arkivat e saj, duke dorëzuar çdo informacion të mundshëm rreth vendndodhjes së varrezave të tjera masive.