Synimet euroatlantike të Kosovës, ministri Maqedonci takon gjeneralmajorin amerikan Nawrat në Berlin

Ministri i Mbrojtjes i Republikës së Kosovës, Ejup Maqedonci, ka zhvilluar një takim zyrtar me zëvendëskomandantin për Integrim në Komandën e Ushtrisë Amerikane për Evropë dhe Afrikë (USAREUR-AF), gjeneralmajorin Christian Nawrat. Këtë takim, kreu i mbrojtjes kosovare e ka bërë të publike përmes një njoftimi, ku ka saktësuar se bisedimet u mbajtën në kuadër të punimeve të Konferencës së Sigurisë në Berlin (BSC). Në qendër të diskutimeve kanë qenë synimet dhe prioritetet strategjike të dikasterit që ai drejton. Veçanërisht, u shqyrtua plani strategjik katërvjeçar, hapat drejt ndërtimit të një sistemi mbrojtës gjithëpërfshirës, si dhe nisma ligjore që parashikon themelimin e Zonës së Industrisë së Mbrojtjes. Po ashtu, gjatë këtij bashkëbisedimi është trajtuar me prioritet angazhimi i shtetit tonë për t'u bërë pjesë e Kartës së Adriatikut (A5), hap ky që konsiderohet i një rëndësie të veçantë për intensifikimin e partneritetit rajonal dhe rrugëtimin drejt integrimit në strukturat euroatlantike të sigurisë. Në fund, ministri Maqedonci ka vënë në dukje domosdoshmërinë e vazhdimësisë së bashkëpunimit dhe bashkërendimit të ngushtë me aleatët ndërkombëtarë, me qëllim ngritjen e kapaciteteve ushtarake dhe garantimin e një stabilieti më të madh në rajon.