Pesë vite art dhe sukses: Opera e Kosovës feston jubileun me sopranon e njohur Elbenita Kajtazi

Përmes një mbrëmjeje madhështore artistike të pagëzuar me emrin “Opera Gala”, Opera e Kosovës do të kurorëzojë më 19 nëntor pesëvjetorin e themelimit të saj. Për këtë ngjarje të shënuar, skena do të presë si të ftuar speciale sopranon e shquar shqiptare Elbenita Kajtazi, e cila gzon një karrierë të suksesshme dhe është kthyer në një nga emrat më të lakuar të skenave ndërkombëtare të operës. Zëri i saj unik do të vijë i ndërthurur me interpretimin e Orkestrës së Operës së Kosovës, e cila do të udhëhiqet nga dirigjenti i njohur italian, Carlo Goldstein. Goldstein mban pas një eksperiencë të pasur ndërkombëtare si në repertorin simfonik ashtu edhe në atë operistik, ndërsa në portofolin e tij artistik numërohen bashkëpunime me institucione të rangut botëror, duke përfshirë Teatro La Fenice në Venedik, Teatrin e Operës në Sidnei dhe Vienna Volksoper, ku ka mbajtur pozicionin e dirigjentit kryesor të ftuar. Koncerti festiv “Opera Gala” do të zhvillohet më 19 nëntor 2026, në ambientet e Klan Arenës në Prishtinë, me fillim nga ora 19:30.