Konfirmim absolut: Bledi Shkëmbi shpallet sërish trajneri më i mirë i javës në Maqedoninë e Veriut

Nuk ka pasur as dyshimin më të vogël se kujt i takonte epiteti i trajnerit më të mirë për xhiron e 12-të në elitën e futbollit të Maqedonisë së Veriut. Ky çmim prestigjioz ka shkuar, pa dyshim, për strategun e skuadrës shqiptare Struga Trim Lum, Bledi Shkëmbi. Kreu i stafit teknik të Struga Trim Lum ka konfirmuar edhe një herë zotësinë dhe shkallën e lartë të profesionalizmit, duke e dëshmuar vlerën e tij pikërisht në terrenin e kampionit në fuqi. Sipas vlerësimeve të mediave vendase, falë një qasjeje taktike të goditur, një leximi të përpiktë të lojës së kundërshtarit dhe një orientimi të duhur të lojtarëve në fushë, Shkëmbi udhëhoqi skuadrën drejt triumfit minimal 0:1 kundër Vardarit, duke arkëtuar tre pikë me peshë të madhe në udhëtim. Ky sukses i radhës konfirmon qartë se ambiciet e Struga Trim Lum për edicionin aktual janë nga më të lartat në kampionat. Klubi krenohet me një organikë cilësore lojtarësh dhe një udhëheqje të spikatur teknike, ndërsa po dëshmon në çdo ndeshje se i ka përthithur mësimet e duhura nga pengesat e sezonit të shkuar. Duke u nisur nga këto premisa, për ekipin e drejtuar nga Bledi Shkëmbi nuk ka sfida të pamundura, qoftë në garën e rregullt të kampionatit, qoftë në Kupën e Maqedonisë.