Në selinë e NATO-s, Mark Rutte i thur lavde Shqipërisë: Përkushtim shembullor në mbrojtje

Kryeministri i vendit, Edi Rama, ka zhvilluar një vizitë zyrtare në Bruksel, ku është takuar me Sekretarin e Përgjithshëm të NATO-s, Mark Rutte, në selinë qendrore të Aleancës Atlantike. Nëpërmjet një postimi në rrjetet sociale, kreu i ekzekutivit shqiptar e ka cilësuar këtë vizitë si një moment me rëndësi të veçantë, duke e përshkruar Rutte si një njohës të thellë të realitetit gjeopolitik evropian dhe një ndjekës të vëmendshëm të sfidave të sigurisë në Ballkanin Perëndimor. Gjatë këtij takimi, kreu i NATO-s ka dhënë vlerësime pozitive për reformat dhe hapat përpara që ka bërë Shqipëria në fushën e mbrojtjes, duke theksuar seriozitetin e treguar në përmbushjen e të gjitha detyrimeve dhe standardeve që kërkon aleanca ushtarake. Bisedimet mes dy liderëve janë përqendruar te kontributi i Shqipërisë si një aktor kyç për paqen dhe stabilitetin rajonal, te investimet e bëra për modernizimin e ushtrisë, si dhe te domosdoshmëria e bashkëpunimit të ngushtë për t'u bërë ballë sfidave të përbashkëta të sigurisë. “Gjithnjë të veçanta takimet me Sekretarin e Përgjithshëm, Mark Rutte, një njohës i spikatur i Europës, vëzhgues i vëmendshëm i Ballkanit Perëndimor dhe dashamirës i hapur i Shqipërisë. Kënaqësi për fjalët vlerësuese dhe inkurajuese për ecurinë e sektorit të mbrojtjes në Shqipëri, si edhe seriozitetin e Shqipërisë në përmbushjen e detyrimeve të NATO-s”, ka shkruar Rama.