Nata e madhe e Ligës së Kombeve: Zidane debuton me Francën, Mancini kthehet në krye të Italisë

Ka startuar zyrtarisht edicioni më i ri i Ligës së Kombeve, një kompeticion që kësaj radhe ka një rëndësi edhe më të madhe, pasi shërben si shteg kualifikues drejt fazës 'play-off' për Kampionatin Evropian 2028. Të gjithë sytë e sportdashësve mbrëmjen e sotme do të jenë të drejtuar nga Liga A. Aty spikat në mënyrë të veçantë debutimi i multikampionit Zinedine Zidane në stolin e Kombëtares së Francës, e cila do të masë forcat me Turqinë, si dhe rikthimi i bujshëm i Roberto Mancinit në krye të pankinës, në sfidën e zjarrtë kundër Belgjikës. Ndërkohë, kalendari rezervon përballje shumë interesante edhe në kategoritë e tjera. Për Ligën B do të përballen Gjeorgjia ndaj Irlandës së Veriut, Hungaria kundër Ukrainës, Polonia përballë Bosnjë & Hercegovinës, si dhe Suedia që presin Rumaninë. Për sa i takon Ligës C, vëmendja do të jetë te ndeshjet Armeni – Letoni dhe Mali i Zi – Qipro. Organizatorët bëjnë me dije se të gjitha takimet e kësaj mbrëmjeje do të transmetohen dhe zhvillohen në dy fasha orare zyrtare, respektivisht në orën 18:00 dhe në orën 20:45.