Paralajmërimi i onkologëve: Zakoni i dimrit që rrit rrezikun e kancerit të mushkërive në shtëpi

Me uljen e temperaturave dhe afrimin e muajve të ftohtë, ambientet e brendshme bëhen streha jonë kryesore për të kërkuar ngrohtësi dhe qetësi. Megjithatë, kalimi i një kohe më të gjatë brenda mureve të shtëpisë kërkon vëmendje të shtuar ndaj cilësisë së ajrit që thithim çdo ditë. Ndërsa faktorët gjenetikë dhe stili i jetesës si dieta apo aktiviteti fizik dihet se ndikojnë në shëndet, ekspozimi ndaj ndotësve mjedisore brenda shtëpisë shpesh mbetet i padukshëm. Kanceri i mushkërive mbetet një shqetësim madhor, ku megjithëse pirja e duhanit është shkaku kryesor, të dhënat nga Qendrat Amerikane për Kontrollin dhe Parandalimin e Sëmundjeve (CDC) tregojnë se 10 deri në 20 për qind e rasteve të diagnostikuara çdo vit i përkasin personave që nuk kanë pirë kurrë duhan. Ekspertët e oncologjisë tani po tërheqin vëmendjen për një nga mënyrat më të preferuara të ngrohjes gjatë dimrit, e cila mund të ndikojë fshehurazi në shëndet përmes përdorimit të shpeshtë të oxhaqeve me dru. Dr. Bradley Hyatt, onkolog në Qendrën Mission Cancer + Blood, shpjegon se oxhaqet hyjnë në grupin e burimeve të përditshme të tymit që shpesh neglizhohen, krahas mangallëve apo shkarkimeve të automjeteve. Sipas tij, ky lloj ekspozimi nuk lidhet vetëm me rrezikun e kancerit të mushkërive, por mund të ndikojë edhe në shfaqjen e tumoreve në kokë, qafë, fshikëz, ezofag, veshka, stomak dhe mëlçi. Të dhënat shkencore e mbështesin këtë shqetësim. Një kërkim i vitit 2023, i publikuar në revistën 'Environment International', analizoi mbi 50,000 gra në Shtetet e Bashkuara gjatë një periudhe mesatare prej 11 vitesh. Rezultatet dëshmuan se ato femra që përdornin oxhak ose sobë me dru për të paktën 30 ditë në vit, shfaqnin një shkallë 68 për qind më të lartë të prekjes nga kanceri i mushkërive, krahasuar me personat që nuk përdornin sisteme të tilla ngrohjeje. Ky rrezik u vu re edhe te gratë që nuk kishin konsumuar kurrë duhan, pasi procesi i djegies së drurit liron kimikate që njihen ose dyshohet se nxisin zhvillimin e kancerit.