Goditet skema ndërkombëtare e Call Center-ave, SPAK dhe Eurojust shkatërrojnë rrjetin e mashtrimit milionësh me kriptovaluta

Një rrjet i gjerë ndërkombëtar, i dyshuar për zhvatjen e qytetarëve përmes skemave mashtruese të investimeve online, është neutralizuar pas një operacioni të gjerë të koordinuar nga Eurojust dhe Europol. Ky aksion i përmasave të mëdha ka përfshirë disa vende, ku bëjnë pjesë Shqipëria, Kosova, Gjermania, Qiproja, Finlanda, Izraeli dhe Maqedonia e Veriut, ndërsa dëmi i përgjithshëm financiar i shkaktuar viktimave llogaritet në mbi 4 milionë euro. Goditja e këtij grupi kriminal erdhi si rezultat i hetimeve që nisën qysh në vitin 2022, pasi një çift gjerman vendosi të denonconte humbjen e kursimeve të tyre jetësore, të cilat i kishin investuar përmes një platforme online pa mundur dot t'i tërhiqnin mbrapsht fitimet e premtuara. Autoritetet zbuluan se skema funksiononte përmes faqeve tregtare online që hiqeshin si të ligjshme, duke joshur qytetarët me premtime për kthime të majme monetare brenda një kohe të shkurtër nga tregtimi i aksioneve, monedhave të huaja dhe kriptomonedhave. Në fazat e para, viktimat inkurajoheshin të hidhnin shuma modeste parash, ndërsa në sistem u pasqyroheshin fitime fiktive për t'u dhënë siguri të rreme. Më pas, ndërmjetësit nisnin një presion të vazhdueshëm psikologjik për t'i detyruar të rrisin investimet. Kur mbërrinte momenti i tërheqjes së fondeve, klientët përballeshin me pengesa burokratike dhe justifikime pafund, derisa autorët fshinin çdo gjurmë dhe zhdukeshin bashkë me paratë. Pas një hetimi katërvjeçar, operacioni përfundoi me kontrollin e 17 hapësirave të ndryshme dhe arrestimin e shtatë personave, të cilët rrezikojnë ekstradimin drejt Gjermanisë. Gjatë kontrolleve, përfshirë edhe një qendër thirrjesh në Kosovë, u sekuestruan mbi 100 servera, materiale digjitale dhe dokumentacion i rëndësishëm provues. Hetimet vunë re gjithashtu se një kompani e vendosur në Qipro dhe Izrael funksiononte sipas modelit “krimi si shërbim”, duke furnizuar grupet kriminale me faqe interneti të rreme për mashtrime kibernetike. Në këtë hetim ndërkombëtar, bashkëpunimi i ngushtë mes agjencive ka qenë vendimtar, ku u ngritën dy grupe të përbashkëta hetimore në kuadër të Eurojust. Përfaqësuesit nga Shqipëria, konkretisht Prokuroria e Posaçme (SPAK), Byroja Kombëtare e Hetimit dhe Policia e Shtetit, luajtën një rol kyç në terren, ndërkohë që Europol dërgoi ekspertët e vet për të ndihmuar në analizimin e të dhënave, hetimet digjitale dhe verifikimin e provave në Shqipëri dhe Kosovë.